Corpus Van Reenen-Mulder (CRM14): Oorkonde K160p35901

Wy Gheraerd die Bonte , Jan Mathys sone ende Jan van Woude scepenne in Breda ende late tsheren van Breda , orconden ende kennen med desen brieve , dat voer ons quam Pauwels Bystroe ende verlyde dat hi sculdech ware Diederike die men heit Tielken Manen , twe scellinghe ouder grote tsjaers erfcyns op syn huus med sinen toebehoerten daer hi nu in woent gheleghen opten Hoernike bi Heinrycs Maghermans huus was ; ende daer na soe verlyde dese zelve Pauwels dat hi hadde ghenomen van Diederike voers_ ene vyftendeel van enen beemde gheleghen achter die belkenaemsche berghe over twelf grote tsjaers erfcyns , moenten daer dene coman den andren mede betalen mach , voer welke twelf grote Pauwels voers_ hem gheset heeft Jueten yftendeel syns wyfs van den zelven beemde alse thenen rechten onderpande ; ende voert syn recht van den lande dat men heit dat Nieuwelant gheleghen by die slachmoelen over drie lopen roghs erfpachts goet ende custbaer daer Pauwels voers_ hem oec geset heeft Jueten kynsdeel syns wyfs als van den zelven nieuwenlande oec thenen rechten onderpande ; altoes te gheldene desen pacht op onser vrouwen dach lichtmisse als + men kersen draghet ende dese twe schellinghe ouder grote ende dese twelf grote payments voerscr_ op sente Mertyns dach in den wintere altoes daer naest volghende . In orconden desen brieve bezeghelt med onsen zeghellen int jaer ons Heren M . + CCC . + vyftech ende neghen , achtiene daghe binnen lochmaent .