Corpus Van Reenen-Mulder (CRM14): Oorkonde K160p37701

Wi Pieter Tierloet ende Jan die Rucheneer , scepen in Breda ende late tsheren van Breda , orconden dat voer ons comen syn heer Arnd Bystro canonync te Breda als momber ende Heynric Bartelmeeus Goedscalx zone als toezienre Gheryts Lysbetten ende Aeghten Diric Bystroes kyndere , die noch onbejaert syn , ende lyden dat si hadden bewyst van + der kynder weghen voers_ joffrou Jueten haerre zuster der nonnen te Breda , viere scellinge grote tsjaers erflix chyns payments daer deen coman den anderen mede betalen mach , alle jare te ghelden op kerssavonde , op een alf buynre beemden dat den kynderen voers_ bestarf van haren vader voers_ , gheleghen op Belckenem after die berghe op die Marcke , behoudelyc drie scelling groten tsjaers payen voers_ die hier voere uut den gheheelen beemde jaerlicx gaen op hoeren gherechten chynsdach . Ende hier mede liet hoer joffrou Juete voers_ met haren momber ghevueghen ende verteech metten rechte op alle andere goeden daer si in bestorven mocht syn , van doede hoers vaders bi consente ende goedduncken mir vrouwen der priorinnen ende van + den ghemeynen convente voers_ behoudelyc zulcker tochten als si hier en~boven heeft met brieven op dat huys ende erve daer haer vader uut verstarf , duerende haer leve~daghe lang ende niet langher . In orconde desen brieve met onsen zeghelen bezeghelt int jaer ons Heeren M . + CCC . + zeven ende tseventich , vyf daghe in Meerte .