Corpus Van Reenen-Mulder (CRM14): Oorkonde K160p38201

Wi Wisse van + der Havene ende Peter die Bonte , scepene in Breda , orconden dat voer ons comen is Zebrecht Thierloet ende bewiesde erfleec den gemeynen convente van + den nonnen~cloester te Breda der oerdine van Premonstreyt tote horen reftere vyfthien schellinghe ende neghen penninghe grote tsjaers erflix chyns payments daer deen coman den anderen mede betalen mach , te heffen jaerlix uut alsulken onderpanden alse hier + na beschreven staen voor die vyfthien schellinge grote erflix chyns payen voers_ die dat convente voers_ te heffen plach op dat huys ende erve , ende op die herberghe di + men heyt ter Camere , daer Zebrecht voers_ nu ter tyt op woendt , ende noch voer ses grote erflix chys payen voers_ die Zebrecht voers_ den voers_ convente geeft jaerlix voer jaergetyde jonckfrou Aechten was syns eersten wyfs ende jaerlix te gelden plach . Eerst so bewyst Zebrecht voers_ den convente tote synen reefter voers_ acht schellinghe ende ses penninghe grote erflix chyns , alsulcker payen tot alsulcken daghe te betalen uut den selven onderpanden ende in alre selver manieren ende voerwerden dat die brief inhout ende begrypt daer dese brief met onse segelen bezegelt door + gesteken es . Voorts so bewyst Zebrecht voers_ den convente voers_ vyf schellinghe ende acht penninghe grote erflix chyns payen . voers_ te heffen alle jaer op S_ Martyns dach in + den winter uut die schuer ende erve met sine toebehoerten , die heer Jan Tierloet toebehoort ende syns vaders plagh te zijn , geleghen in de Caterstrate tuschen Wouters erve van Berghen op deen side , ende Jan Tierloets erve op dander side . Ende al eest dat uut dese schuere voers_ jaerlix uut + gaen vyftien oude groten die syn heeren Jan Tierloet voers_ anderswaert bewyst te heffen om hem selven mede te quiten , gelyck als hi met sinem monbaer voer ons scepene voers_ verlyde . Item soe bewyst Zebrecht voers_ den convente voers_ acht grote tsjaers erflix chyns paeyen . voers_ te heffen alle jaer op S_ Martyns dagh in + den Winter op dien huuse ende erve daer Goedscalc die Wever in woendt , geleghen in de Vischerstrate tuschen Dierick Gruters erve op deen side ende Met Foyen erve op dander side , naest den heerenchys daer uut te gheven gelyck alse hem voer ons verlyde . Item bewyst Sebrecht noch den convent voers_ op sente Martyns dach in + den winter op dat huys ende erve daer Met Foyen voers_ in woendt , daer neven alse voers_ is , behoudeleek sulcken commer alse hier met rechte voer uut + goet . Item bewyst Sebrecht noch den convente voers_ tot sinen reefter voor Jonfrou Aechten jaergetyde voers_ ses grote paeyen . voers_ jaerlicx te heffen op sente Martyns dagh in + den winter op Peter Ysacx huys ende erve geleghen in de gasthuys~strate tuschen Willem Heynen soens erve op deen syde ende Rutten Sniders erve op dander syde , naeste den heren~chise daer uut + te + gane gelyck als Zebrecht voer ons scepene voers_ verlyde , met welcher bewysinghen ham dat gemeyn convent tote sinen reefter voers_ wel lyet ghevueghen , ende scanden daer of quite Zebrechts herbeye , die + men heyt Ter Camer ende syn erve voers_ gelyck als die brief met des gemeynen convents zegel bezegelt wel inhoudt ende begrypt . In manieren dat Zebrecht voers_ geloeft heeft alle dese voers_ onderpande te vryen ende te waren teghen elken mensche ghelyc alse voers_ es , ende die bewysinghe ende dien erfchys voers_ daer mede . In orconde desen brieve met onsen zeglen bezegelt , int jaer ons Heren M . + CCC . + tachtich ende twee , acht daghe in Meerte .