Corpus Van Reenen-Mulder (CRM14): Oorkonde K160p39103

Wy scepen , gezwoerne ende ghemeyn poirte van Breda , orconden ende kennen , want tghemeyn convent van den nonnen te Breda enen wagenwech plaghen te hebben langs die veste , an die west~side van + de gasthuyse , die wi hem verleeght hebben ende bewyst erflyc te ghebruken , an dander side omme , an die oest~side van + den gasthuyse welken voirscr_ wech , wi hem gheloeft hebbe , hebbe , aldaer ende gheloven te vryen en te waren tallen daghen ; soe hebben wy hem dair af te rastore ghedaen ende erflyc quyt ghegheven derthien oude grote , die si der poirten jairlicx plaghen te ghelden , van Buters hoec , voir alsulc scade ende hinder als wy hem dair ane ghedaen moghen hebbe . In ghetughenisse der wairheyt hebben wy scepen , ghezworene ende ghemeyn poirte van Breda voirscr_ dese brief bezeghelt met onse ghemeynen poirt~zeghle int jair ons Heren M . + CCC . + een ende neghentich , zeven daghe in September .