Corpus Van Reenen-Mulder (CRM14): Oorkonde K161p32601

Wi Jan Cockelberch e Wouter van Bavele , scepen in Oesterhout , maken cont , allen den ghenen die desen brief sellen sien ofte horen lesen , dat voer ons comen es Henric Reymbout , ende verlide dat hi hadde ghenomen twe bundre beemde , die gheleghen sijn in den Wijsterd tote Oesterhout , te gherechten cijns ieghen tgoeds~huys van Tongerloe , durende tote sinen live e Kathelinen sijns wijfs e niet langher , e welc hoere van hem beyden die lancste leeft , die sal beyde die bunre behouden gheheel siin levedaghe , sonder iemans wedersegghen ; eelc bunre voernoemt iaerlycs om vyf scellinghe zuerte enen ouden groeten Tornoysen van tconincs monte van Vrankerike , gherekent voer xvj d_ , oft payment dat daer goet yeghens waere ; ende desen tcijns voernoemt es men sculdech altoes te betalen op sente Mertijns dach in den winter ; e hier + mede soe saelt Henric e Kateline siin wijf verwaren van theren cijns e van alle onghelde hoer leefdaghe ; e welken tijt dat Henriic e Kateline voernoemt siin comen van live te doede , soe saelt tgoeds~huus van Tongherloe voernoemt sijn hande aen slaen oft die van tgoeds~huus weghen siin aen die twe bunre beemde voernoemt , sonder enech wedersegghen van hoere beyder erfghenamen oft van yemanne . In kennissen der waerheyt soe hebbe wi scepenen voernoemt desen brief beseghelt met onsen seghelen . Ghegheven int jaer ons tHeren &mring; ccc ende xxv&jring; , des saterdaghes nae sente Aghaten dach .