Corpus Van Reenen-Mulder (CRM14): Oorkonde K161p33201

Wi Heinrijc Reinbout , Jan Pauwels ende Heinrijc Smit , scepenen in Oesterhout , maken cont al + den ghenen die desen brief sellen zien oft horen lesen , dat voer ons quam Enghelraet met horen witteghen monbore ende Jan hore oudste soen , die si hadde bi Robbrechte die hare witteghen man was , ende verteghen voer hof ende voer here als soe recht was , tote broeder Jans behoef van Oesterhout , canonc van Tongherloe , op al selc goed als hem versterven was van broeder Jans moeder voerseit ende Enghelraet ende Jan haer sone voerseit , kenden ende liden dat hem gnoech ghedaen waere ende sco?den broeder Jan daer af quite ; ende voert gheloefden si , waer dat sake dat enich erfghename wonne metten rechte , dat Enghelraet die Robbrechts wijf was ende Jan haer sone voerseit , niet en soude delen in al ofte in som als dien versterfte , dat si daer af broeder Jan voerseit af sellen ontheffen ende scadeloes houden al + toter sommen van x stuver groete ofte payement dat daer goed jeghen es ; na ghelande dat sal comen draghende ende hier af heft Enghelraet met haren witteghen monboer borghe gheset voer scepen ende Jan Robbrechts sone haer kint voerseit heft hier af gheloeft voer scepen op hem ende op siin goed gnoech te doene voer siin broeder ende voer sine zusteren , ende dat hi + se sal doen vertien op dese vorwaerde voerseit als si siin comen tote horen jaren . Ende omme~dat dit waer es , soe hebbe wi scepen voerseit Henrijc Reynbout , Jan Pauwels sone ende Heynrike den Smit dit beseghelt met onsen properen seghelen uuthanghende . Ghegheven int jaer ons Heren M˚ CCC xxxj . des donredaghes na sente Pauwels dacht in + den winter .