Corpus Van Reenen-Mulder (CRM14): Oorkonde K185p34902

Wy Jacob Jacobs soen ende Thomaes Eghenhout , scepen in Oesterwijc , maken cont enen ygheliken dat quam voer ons jonfrouwe Gudelt Bertout Bacs suster was , ende bekende hoer dat si sculdech is van wyttechtegher scout Wouteren die + men heit Groet Wouter horen suagher , vier pont ouder groet tot siinre maninghe ende tot sinen wylle the betalen ende daer voer soe heet si Wouteren voerseyt in die hant gheset tot enen rechten onderpande een mudde rogghen erfpachs , dat hoer Godevaert die Becker van Beke gheldende is , ende vive ende dertech scellinghe outs ghelds die + men hoer the Walwijc gheldende is , alsoe al si seyde . In orconde desen brieve beseghelt open met onsen seghelen . Ghegheven in + den jaer ons Heren dusent drye + hondert veertech ende neghen , op des heylichs cruus dach , dat + men heyt ons Heren opvaert .