Corpus Van Reenen-Mulder (CRM14): Oorkonde K185p34903

Wy Peter Judaes ende Heinric die Coster , scepen in Oesterwijc , maken cont enen yegheliken dat voer ons quam Willem Godevaerts Voss soen ende Godevaert die Voss sijn vader , ende bekenden hem dat si hadden vercoft ghezamender hant ende onghescheiden in enen witteliken coepe nae volcomenen gheboden daer af ghedaen in + der kerken van Haren , alsoe als recht was , als ons twee man seiden uter prochyen van Haren , Heinriken gheheten Donc , een goet gheheten Havicsdonc , dat wilen was Willems van Esche , uutghenomen een buenre broecs dat Gheen Peynenborgh ghecoft heeft ende een heidenlaerken , dat her Wouter die Pape ghecoft hadde , alsi seiden ; ende hebben gheloeft Willem ende Godevaert die Voss sijn vader voergh_ ghesamender hant ende onghescheiden op hem ende op hoer goet Heinriken Donc voers_ allen voercommer ende alle kalangie af te doen van + den voerghenoemde goede , uutghenomen tien scillinghen ende twee penninghen nuwe die + men den hertoghe van Brabant daer af gheldende is , ende uutghenomen neghen penninghen ouds ghelds , die men der ghemeinten van Oesterwijc daer af gheldende is , ende uutghenomen twee mudde rogghen erfpaghts die + men daer oec af gheldende is ; ende dese voerghenoemde erffenis te waren op dese voerseide gheloeft als + men sculdich is te waren ende ghewoent is . In orconde desen brieve bezeghelt met onsen zeghelen , in + den jaer ons Heren dusent drie + hondert veertich ende neghen , tsondaeghs nae sente Baven dagh .