Corpus Van Reenen-Mulder (CRM14): Oorkonde K197p36201

Wy Claus Wilhelms ende Diderijc van + den Bekerdijc , scepene in Beke , tughen onder onsen ghemeynen zeghel , dat voer ons was ghestaen Machghilen van + der Hagorst , ende gheloefde als een principael sculder op hem ende op sijn goede , Jane Goderts zone was van + der Hagorst , sinen swagher , hondert ponde den selven Jane te betalen slechs nae dode Machghiels voers_ in alzulkenen payment als op + den paydach tsghels voers_ ghemeynlijc ten Bosghe in boersen gaen sal . Ghegheven tsdonresdages nae den sondaghe volghende als men singhet Reminiscere int jaer ons Heren dusent drie + hondert tsestich ende twe .