Corpus Van Reenen-Mulder (CRM14): Oorkonde K211p34701

Wi Jacob van der Mere , Godevart de Deckere , Peter Elyaes , Jan Tiels , Ween Beys , Dideric van der Mere , Jan van + den Vorst , scepene in Welde , doen cont allen liden , dat voer ons comen is Juete van Ele , Ghertruud . Margreta , Kateline , kindere wilneer Claus van Ele met Arnde van Aerle , haren wittegen monbore , ende hebben bekent dat si vercocht hebben Jan van Bokele portere van Herenthals , vive gulden hellinge goede ende gheve , erffelike ende jaerlics tsijns allewege te sinte Jans + dage Baptiste den vorgenoemden Jan of brengere des brief wittelike ende wale te vergildene ; die voergheseeghde vijf gulden hellenge of die werde dar na , op enen hof die ghelegen is bi Jan Clercs daer men op sayt v lopene ende op ene scure daer staende ; ende oec hebben die vorges_ joncvrouwen mit haren monbore geloeft een huus daer op te setten binnen drie iaren ; ende oec op tue stucken lands die gheheten sijn die Huustaet ende Drihorrinc , daer men op sayt sesse lopene ; voert so hebben de voerges_ joncvrouwen met haren vorges_ monbore dese voerges_ onderpande op drie grote ende een virendeel als hof~tsyns ende op dese voerges_ vijf gulden hellinge geloeft te declareren ende te vercleerne , uutgenomen een gedeelken in den hof bi Clercs , dat is Jans kinder van der Mere , dat niet in onsen onderpande ende steet , als in des vorges_ Jans van Bokele ende een ghedeelken is Jacob Sniders . In kennisse der waereit so hebbi wi desen brief besegelt met onsen segelen , int iaer ons Heren als men scrijft dusent die + hondert viertech ende sesse , des achtiende daegs van Loymaent .