Corpus Van Reenen-Mulder (CRM14): Oorkonde K220p35101

Wi danel die rademaker / gherit lachghaerds / godeuaert scuensincs / heinric smeeds / heinric nyclaus zoen / wouter hoyfmans / En_ bartolomeus hoyfmans / Scepene in Eersel / tughen dat voer ons comen is didderic jhans zoen was van papen driessce / En_ heeft vercoft / ghelyt / en_ ghekent dat hi erfelike vercoft heeft voer hom / en_ voer sijn erfghename_ nae hom / gheertruden / wouters coelborrers dochter was van (onleesbaar) tot hoeren behoef / en_ hoerre erfghename_ nae hoer / Twe mudde goeds rogghe_ en_ gheefs jaerlijcs erf~pachts / alle_ jaer erfelike_ / en_ o_mermeer / op sente andries dach apostels te ghelden / en_ te betalen met der gherechter maten van eersel En_ te heffen en_ te boere_ wt ene_ huse / en_ houe met allen sine_ toebehoerte_ dat jacobs gheheyte_ slabbards te wesen plach En_ wt der beteringhe_ va_ ene_ beemde gheheyten die scoet dat is te weten wt dien dat die beemt beter is dan der heren tijns van den gronde / En_ dan een pont syaers dat men heinric den herde daer jaerlijcs wt te ghelden plach / als hi lijde / en_ kende / En_ wt ene_ stuc lands gheheyte_ die dael~ecker / een yeghelijc / en_ al met allen sine_ toebehoerte_ / gheleghen in der prochghien van eersel / En_ dat didderic voerseyt heeft gheloeft op hom / en_ op sijn goet der voerseyder gheertruden en_ hoere_ erfghename_ nae hoer / dese voerseyde twe mudde rogghen syaers / te weren in alle dit voersproke_ erue met allen sine_ toebehoerten als men erue met recht sculdich is te were_ / En_ alle_ voerco_mer af te doen / sonder der here_ tijns van den gronde / En_ sonder dat voerseyde pont syaers dat men daer jaerlijcs wt gheldende is / Ghegheue_ onder onse_ ghemeyne_ Seghel des Scepe_doems van eersel / jn den jaer ons here_ / doe men screef / dusent / + drie + hondert vijftich en_ ene / op onser vrouwe_ dach hoerre op~vaert in oghest~maent .