Corpus Van Reenen-Mulder (CRM14): Oorkonde K237p34901

Wi Jan de Raet ende Jan Loenijs , scepene der porte van Turnout , maken cont ende kenlike allen den ghenen die desen brief selen sijn ofte horen lesen , dat voer ons comen is Jan Peters sone van + den Dike , ende heft bekent ende verlijt dat hi is scueldich her Janne van + den Plaessce riedder , neghen mudde rogs aerflixs paechs ob een goet dat des voerghenoemde her Jans waes , dat men ghemenlike noemt Jan Bermans hove , met hare thoebehoerthe , goeden rogghe ende cusbaer , jaerlijx te leveren metter maten van Turnout in onser vroeven daghe dat men kersen dreget , te betaellenen , die men heet sente Marien Lijchmisse ; voer~mier waert te sake dat dese voerscreven Jan nijt gnoech en dade den voerghenoemden her Janne van den Plaessce often breengher des briefs , in allen voersproken tide , soe soude dese voerghenoemde her Jan sijn hant slaen ane sijn onderpant , al~soe als recht ware , sonder wedersegghen des voerscreven Jans ofte sire herfghenaemmen enech , eelck ende al sijn hier thoe ghedaen die men pleghet ende scueldich is te doune , behoudelike ighelike sinen rechte . In kennissen der waerheeth ende omme bede willen der partien , soe hebben wi scepene voerghenoemt desen brief bezeghelt met onsen zeghele . Ghegheven int jaer ons Heren doe men screef ducent drie + hondert ende neghen ende viertech , des saterdaeghes nae sente Martijns daech .