Corpus Van Reenen-Mulder (CRM14): Oorkonde K239p36201

Cont si ende kenlech allen den ghenen die dese letteren zelen zien ende hoeren lesen , dat komen es Jan Bau vore de manne , die manne sijn int hof van + der Elst te Duffle , ende heeft ghekent ende ghelijt , dat hi vercocht heeft witteleke ende wale heren Wouteren gheheten Bac , bi + der gratien Goeds abdt te Tongerle , vive oude gulden hellinghe tsaers erfelecs chijs , te gildene en + te betaelne tallen kersavonde , op viere~d + alf boendere lants metten gronde ende dat daer toe behoert , luttel min ochte luttel meer , ghelijch dat houdende es , gheleghen te Duffle ; van welken vorgh_ vijf gulden hellinghen de vorgh_ Jan Bau bi manissen des heren ende bi wijsdoeme der manne in des heren handt op heeft ghedraghen ende daer af verteghen metten halme ; ende van alden rechte dat hi daer ane hadde ochte hebben mochte , ende dat te mijns heren heren Wouters behoef vorgh_ ; ende hier toe es ghesciet al datter toe sculdich was te ghesciene metten vonnisse ende metten rechte , ende gheen point van rechte achter ghelaten , behoudeleke altoes jeghewelken sinen rechte ; ende omme dat ic Jan Bau vorgh_ wille ende begare dat dit vaste , zeker ende ghestade blive + , soe hebic dese letteren bezeghelt met minen properen zeghele in kennissen der waerheyt ; ende bidde voert Gielise van Overbroec , Janne van Waerlose , ende Godevaerde van + der Tanghen , die manne zijn int hof van + der Elst te Duffle , dat zi hare zeghele hanghen ane dese letteren in ghetughenisse der waerheyt . Ende omme dat dit zoude bliven vaste ende ghestade , ende over~mids der beden ende begaren ons liefs heren Wouters vorgh_ ende Jan Baus vorgh_ , soe hebben wi Gielis van Overbroec , Jan van Waerloes ende Godevaert van + der Tanghen , manne vorgh_ , onse zeghele ghehanghen ane dese letteren in kenlecheyden der waerheyt . Ghegheven int jaer ons Heren doen men screef M˚ CCC˚ tsestech ende twee , opten tienden dach in Augustio , ende die men oec heet Oegstmaent .