Corpus Van Reenen-Mulder (CRM14): Oorkonde K241p36401

Jan van Landewijc , here van Retye , ridder , doen cond allen lieden , dat wi al dat goed daer her Woutere van Corvele , persoen van onsen dorpe van Retie op es gheseten , dat es te weten sine poerte , scuere ende husinghe , ghesticht in + der straten te Retie , daer wine af ghecalangert hebben vortijts , ende eusel dat men heyt Brabants~goed , daer Henric der Dapper te sinen behoef vortijts toe comen es , alsoe verre alst onder ons gheleghen es , ende hi nu ter tijt beloken , begraven ende begrepen heeft omtrent sinre woninghen , clerlic mortificeren te sinen behoef ende andere persone die nae hem comen selen in onsen dorpe van Retie vors_ ; ende want wi goede voer oghen hebben willen , soe ghichte wi hem dit goed vors_ in alder maniren alst vorscreven es , behoudelic altoes ons ende onsen nae~comelinghen daer in onser hoegher herlicheit ; voert soe gheloven wi den vorgh_ persoen te houdene in onsen bescermenisse ende hoeden nae onser macht , ghelyc dat en lants~here sinen capellaen sculdich es te houden in alle behoerliken zaken , al arghelist uut~ghesloten . In orconscape welker dinghen wi hebben onsen properen zeghel deser letteren aen~ghehanghen , ende om merre zekerheit hier af , soe bidden wi onsen scepenen van onsen dorpe van Retie vors_ dat sij haren ghemeynen seghel metten onsen oec desen letteren aen willen hanghen in ghetuchnisse der waerheit der zaken vorscreven . Ende wij scepenen van + den dorpe van Retye vors_ , soe hebben wij onsen ghemeynen zeghel te~samen metten sinen aen desen brief ghehanghen in kennisse ende orconscape al der dinghen die boven ghescreven sijn . Ghegheven int jaer van + der gheboerten ons Heeren dusent drie hondert sestich ende drie , seventien daghe in Lomaende .