Corpus Van Reenen-Mulder (CRM14): Oorkonde K285p35001

Allen den ghenen die desen brief selen sien ende horen lesen / wij Gilijs nulaet Pet_ minne ende jan de pott_e late tsonderkelw_ders van sente bernaerds / wij doen te wetene ene jeghewelken dat es comen vore ons ende vore janne van + den veere recht_e tsonderkelw_ders vornoemt jan ghisel mins sone ende heeft verlijt dat hi vercocht bruder Pauwelse sanders monch van sente bernaerds enen ouden guldenen hellinc van florence goet ende custbaer van goeden goude van effenen ghewichte ende van gherecht_ munten ocht de werde daer af jn and_en goeden paymente jaerlijcs ende erflijcs tsijns te gheldene van janne vorghenoemt ochte van sinen nacomelinghen brueder pauwelse vorseit ochte sinen nacomelinghen dierste paye nu te kersauonde naest toe~comende es ende alsoe voert jaerlike ende erflike te gheldene telken kersauonde voertmeer soe heeft jan voernoemt den recht_e ja_ne van + den veere vorseit op~ghedreghen in de hande tenen gherechten onderpande ghelijc alse een vonnisse wijsde drie virendeel winnents lands gheleghen binnen scelle acht_ pet_ ha? en_ dat men houdt van + den onderkelwerd_e vornoemt daer na bi consente brueder pauwels so erfde de recht_e vorseit in + den vorghenoemden onderpant merte_ne den roden alse euen goeden ghichtdraghere ende merten besette ende gaf weder janne ghisels vornoemt den vorseiden onderpant / op enen guldenen hellinc tsiaers ghelijc alse vorscreuen es . Jn alselker maniren waert dat sake dat jan vornoemt teneghen kersa?de in ghebreke ware van te gheldene in enen deele / ochte in al so soude merten vorghenoemt sine hand moghen slaen ane den vorghenoemden onderpant metten rechte ende vromen ende ontvromen / tote aen dier tijt dat hem volghouden ware / want dese dinch alsus vore ons ghesciet sijn met enen volcomenen rechte ende gheen poent van rechte acht_ ghelaten es ende wij late vornoemt ghene p_pre seghele hebben Soe bidden wj eersamen cnapen ende wisen / jacope sanders ma_s man onser lieu_ vrouwen van machlen ende van Cleue / willeme den coc ende janne van + den veere haren mannen van monde dat si desen brief willen beseghelen jn orconden ende meere vestinghen deser voerscreuender dingh / Wij oech bouden van ? ende bertel ruussche late sente peters van scelle doen kenlec allen lieden dat jan ghisel mins sone vorseit als erfname / ende kat_ine sijn moeder alse toghterse van + den vorghenoemden onderpande / quamen vore ons / ende verliden / ende concenteerden alle + der vorscreuender dingh ende setten noch tenen gherechten onderpande een buender lands gheleghen binnen scelle / neuen pet_ scats land / welke men houdt van sente petre van scelle o_me den voerseiden guldenen hellinc Jaerlijcs ende erflec te bet te ghildene van + den welken onderpanden vore ende na ghenoemt ende gheset / kat_ine voerseit ghinc af ende schout quite hare toght ghelijc alse een vonnisse wijsde / Ende hier + toe ghesciede sonder ijt acht_ te latene ende jn + de voerseide sake / al datter sculdech was met ene rechte toe te ghesciene / Ende baden ons dat wij dit op hen wouden tughen ende kennen / Ende want wij bouden ende bertel voernoemt ghene seghele en hebben / bidden wij den mannen ghelijc dat si vore ghenoemt en_ ghebeden sijn / dat si dese onse kennisse oech willen beseghelen / Ende wij jacop sanders / willem de coc ghelijc alse wij voerghenoemt sijn Ende ic jan van + den veere oech alse recht_e / ou_mids bede van allen den vorseiden laten / ende oech bede van allen den p_tien hebben wij jn orconscapen desen brief beseghelt met onsen p_pren zeglen / Ghegheuen jnt Jaer ons h_en / Dusentech / + Drie hondert / + Neghene ende veertech / op den . xxviij . dach van merte .