Corpus Van Reenen-Mulder (CRM14): Oorkonde K285p36401

Allen den ghene die dese l_ren selen sien ochte horen lesen / Wij Jan steylaert / Jan de man En_ Rogier sijn brueder Late Gilijs sanders maken cont dat vore ons comen es Gilijs pleetsaert / lide en_ kende dat hi vercocht heeft wale en_ wittelec om ene su_me van ghelde die hem volcomelec al es verghouden / Clause heinrijcs oeden + zoens zone wilen was en_ margrieten sinen witteghen wiue / enen ouden ghuldene florijn van florensen / goet van goude en_ van gherechten ghewichte ochte de werde daer na in goeden and_en ghelde te ghildene en_ te betalene van den voerghenoemden Gilise pleetsarde ochte van sinen erfghenamen / den voerseiden Clause en_ margrieten sinen wiue / ochte haren nacomelinghen voerdane erfelec en_ e_m__meer alle jare te elken kersauonde / En_ hier vore heeft de voers_ Glijs pleetsaert gheset te enen onderpande sijn huus en_ hof alsoe alst gheleghen es te scelle tusschen Adelisen (onleesbaar) huus aen deen side / en_ jans huus van londersele aen dander side / En_ al + den voers_ onderpant mochten de voergh_ Claus en_ margriete sijn wijf aenverden en_ hare hant daer ane slaen / alse ane haren bewijsden en_ besetten onderpant ghelijc dat een vonnesse wisen soude waert dat hen de voers_ Gilijs pleetsaert niet volcomelec en goude noch ghenoech en dade van + den voergh_ ghuldenen hellinghe ten voers_ daghe ghelijc alse voerscreue_ es / behouden ene_ yeghewelken sinen rechte / En_ hier toe es ghesciet al datt_ metten vonnesse en_ metten rechte sculdech toe was te ghesciene na de vsagie van + den lande / en_ gheen poent van Rechte acht_~ghelaten / En_ want wij late voergh_ alle ghene p_pre zeghele en hebben soe bidden wij eersamen en_ wisen lieden / Gilise sanders alse here van + den voers_ onderpande / stase van scelle en_ janne van + den vere / dat si desen brief bezeghelen willen met haren zeghelen jn kennessen der waerheit / En_ wij Gilijs sanders / saes van scelle en_ jan van + den vere alle voerghenoemt / ou_mids bede der voerseider late en_ oec der p_tien in beiden siden soe hebben wij desen brief bezeghelt met onsen p_pre zeghelen jnt jaer ons heren Dusentech . + Drie + hondert / + Tsestech en_ vire / Op den seuentienden dach van hoymaent