Corpus Van Reenen-Mulder (CRM14): Oorkonde K307p31101

Wij Jan Bantfelt , Gosuijn van + der Heiden , Hildegarden , herman Wouter Dillen , Gerart Diderics , Henric van + den Rode ende Henric Weinkens , schepenen van Ghele , doen cont allen den ghenen die dese letteren solen sien ende horen lesen , dat vor ons es comen Godevart Haec ende Willem sien sone , ende hebben gheloeft Lodewike van Scoutbroec , ware dat sake dat iman quame te rechte ende te hove die spreken woude totte dien beemden die te Winkelem omgraven ligghen , die meester Wouters gheweest hadden , die de vorsede Lodewijc van Scoutbroec ghecocht heft , dattene Godevart Haec ende Willem sien sone quite ende commerloes daer af houden solen ; voert so heft die vorsede Godevart Haec gheloeft den vorseden Lodewike dat hi hem ene lettere leveren sal van mijn herren Otten van Kuyc , dat hi met vonnisse ende met rechte tote dien vorghenoemden beemden comen es , ende daer in gheerft ; ende van + desen vorwerden so es borghe Wouter die + men heet Wellen Godevarts ende Gilijs die Costere van Ghele ende die vorsede lettere van mijn heren Otten van Kuyc sal hem Godevart leveren tusschen nu ende kersavont . Ware oec dat sake dat den vorseden Lodewike iet ghebrake van desen vorwerden , die vore ghescreven staen , so soude hi comen tote Ghele , ende kisen ene herberghe daer die vorghenoemde borghen in comen solen ende niet uit te gaene op enen banduen vieftech ponden , wanneer sies ghemaent werden , Lodewike en ware gnoech ghedaen , ofte met sinen wille ; ende om~dat ons deze vorwerden cont sien ende sies ons in beiden partien ghebeden hebben so hebben wijt beseghelt met onsen ghemeinen seghele . Ghegheven int jaer ons Heren doe + men screef dertien hondert ende elleve , in sinte Matheus daghe .