Corpus Van Reenen-Mulder (CRM14): Oorkonde K325a34501

Wi , scepenen ghemeinleke van der vriheit van Walem , mijns heren van Duffle , doen cont met kennessen der waerheit , allen den ghenen die desen brief selen zien ofte horen lesen , dat comen es vore ons ende vore onsen rechtere , Thomaes Tyelen ende heeft bekent , dat hi heeft vercocht wale ende witteleke twintech scellinghen tsjaers erfeleke Lijsbetten , Boudens Lanscapen dochter , op sijn huus ende op sijn hof ghelijc dat staet ende gheleghen es binnen der vriheyt te Walem , ende altoes dit voerghenoemde ghelt te betaelne van jare te jare te Kersavonde . Voert ware dat sake dat de voerghenoemde Lijsbet quame te voergheseghde pande , soe sal si pleghen al dies opgheseten late pleghe . ende dit es ghesciet met manessen ons rechters ende met onsen vonnessen daer op ghewiest , ende gheen poent van rechte achter ghelaten dat daer sculdech toe was te sciene , waer bi dat Lijsbetten ende Thomase voerghenoemt wale ghenoechde in den rechte . ende omdat dese voerghesprokene vorwerden vaste ende ghestadech selen bliven , soe hebben wi , scepenen van der vriheyt van Walem voergheseghet dit bezeghelt met onsen ghemeinen propren zeghele uuthanghende , ende dit was al ghedaen in den jare ons heren als men screef M CCC ende vive ende veertech , te half Meye .