Corpus Van Reenen-Mulder (CRM14): Oorkonde K325a35101

Ane alle de ghene die dese letteren selen sien ende hoeren lesen , scepenen vander vriheit van Waleem , ghemeinlike saluut ende kennisse der waerheit . wij doen te wetene jeghewelken , dat vore den rechtere ons liefs heren , mijnsheren Heinrics Berthouds , here van Duffle ende van Ghele , ende vore ons comen es , Jan , die men heet Bau , ende heeft bekent dat hi wetteleke ende wale vercocht heeft Jan Stoep , van Arschot , sinen bemd met den gronde ende dat daer toebehoert , houdende omtrent drie vierendeel , lettel min ochte meer , die gheleghen es in de vriheit van Waleem , achter Jan Reckemans erve , tusschen den bemd tcloesters van Roesendale in de eene zide , ende den bemd brueder Claus Swisseleren in dandere zide , dien men houdende es van onsen lieven heren vorseegt . Welken bemd metten gronde ende dat daer toebehoert , de vorghenoemde Jan Bau , bi manessen des vorseits rechters ende onsen wijsdoeme , in des vorseiden rechters hand opdroegh , ende verteegh daer af metten halme , ende van al den rechte , dat hi dar ane hadde ochte hebben mochte , ende dat te Jans behoef van Arschot vorghenoemd ende siere nacomelinghe . ende heeft gheloeft de vorghenoemde Jan Bau , den vorseiden Janne van Arschot , hier af waerscap bi jare ende bi daghe , ghelyc als men pleeght ende men sculdegh es te doene . Welken dinghen al~dus gheschiet , de vorghenoemde rechtere bi siere manessen ende onsen wijsdoeme , in~dede ende in~erfde de vorghenoemde Janne van Arschot , in desen vorghenoemden bemd met den grond ende dat daer toebehoert , erfeleke te besittene , behoudeleke altoes jeghewelken sinen rechte . In orcond hier af hebben wii , scepenen vorghenoemd , onsen ghemeinen zeghel ane dese letteren ghehanghen in kennissen der waerheit , die ghemaect waren int jaer ons heren , doen men screef , M CCC een ende vijftegh op sinte Margarieten dagh , maghet .