Corpus Van Reenen-Mulder (CRM14): Oorkonde K325a35801

Allen den ghenen die dese letteren zelen zien ende horen lesen , scepenen vander vriheit van Waleem , ghemeinlike saluut met kennissen der warheyt , wij doen te wetene jeghewelken , dat comen es vore den drossate ons liefs heren , heren Heinrijch Berthouts , here van Duffle ende van Ghele , ende vore ons johannes Stoep , van Aerscot , ende heeft ghekent ende ghelijt dat hi heeft ghegheven den goetshuse van Roesendale ghemeinleke , sesse guldene hellinghe tsaers , goet ende gherecht van goude ende swaer van ghewichte , erfelecs tsijs , te gildene ente betaelne ten tween tiden van den jare , dats te wetene , dene helft tallen Kerssavonde ende dander helft tallen zente Jans daghe Baptisten van siere gheboert , op drie voerendeel bems metten gronde , luttel min ochte luttel meer , gheliic alse de vorghenoemde johannes Stoep terve gaf Janne Reckemanne , ende gheleghe es achter de huussinghe Jan Reckemans , in dene side gheleghen des goetshuus goet van Roesendale , ende in dander side gheleghen Wouters Wisseleren goet . ende hier af soe heeft de vorghenoemde Jan Reckeman gheset tenen onderpande , sijn huussinghe ende hoeffinghe metten gronde ende dat daer toe behoert , gheleghen neven dit vorghenoemt goet in der vriheit van Waleem , ende men houdende es van onsen lieven gheminden here van Duffle vorghenoemt . Welke sesse guldene hellinghe vorghenoemt de vorghenoemde johannes Stoep , bi mannissen des vorseits drossaten ende bi onsen wijsdoeme in des drossaten hand op heeft ghedraghen , ende dar af verteghen metten halme , ende van alder rechte dat hi daer ane hadde ochte hebben mochte , ende dat te goetshuse behoef vorghenoemt , soe~dat de vorseide drossate bi siere manissen ende bi onsen wijsdoeme in~dede ende in~erfde Janne Mule , des vorghenoemt goetshuus behoef van Roesendale , in deze vorghenoemde z?sse gulden hellinghe erfeleke te besittene . ende Jan Muul vorghenoemt , heeft gheloeft vandes vorghenoemt goetshuus weghen , waren dat sake dat hen dat goet quame ter hant , dat si souden pleghen ghelijc dat op~gheseten laet pleecht onder mijnhere van Duffle vorghenoemt , van desen vorghenoemde goeden . ende hier toe es ghesciet al datter toe sculdech was te ghesciene , metten vonnisse ende metten rechte , ende gheen point van rechte achterghelaten . ende in orconde hier af , soe hebben wij , scepenen vorghenoemt , onsen ghemeinen zeghel ghehanghen ane dese letteren in kennissen der warheit . dit was ghedae int jaer ons heren , doen men screef M CCC vijftech ende achte , des disendaegs vore Zente Mertens dagh .