Corpus Van Reenen-Mulder (CRM14): Oorkonde K325a37601

Wi , scepenen van der vriheyt van Walem ghemenleke saluut met kennissen der warheyt , doen te wetene allen lieden , dat comen es vore den drossate ons liefs ghemins heren van Duffle , ende vore ons , Mechghiel vanden Heestere , ende heeft ghekent ende gheliit , dat hi vercocht heeft witteleke ende wale , Henriic Heermans , van Rethye , twee gulden penninghe , die men heet Brabantsce mottone , goet ende gherecht van goude ende swar van ghewichte , ochte altoes de werde dar na in anderen goeden ghelde , tsaers erfelex tsiis , te gildene ente betaelne , deen helft tallen sente Jans daghen Baptisten in midden~zomere , ende dander helft tallen Kerssavonde dar naest volghende , op huussinge , hoeffinge , lant , beemt , ende chiis , metten gronde , ghelegen inder vriheyt van Walem , den Rosendaelschen wech , die te Lancbroec wert gheet in deen side gheleghen , ende Roelands Tielens goet in dander side gheleghen , gheliic alse houdende es Jan vander Sleppen , ende hi vortiits ghecreech jeghen den vorghenomden Mechghiele vanden Heestere . War oec dat sake , dat men dese vorghenomde twee mottone niet en gave van jare te jare , gheliic alse vorgheseegt es , so soude de vorghenomde Henriic siin hant slaen ane dit vorghenomde goet , gheliic alse een vonnisse wisen soude . ende hi gheloeft , ware dat sake dat hem dat goet quame ter hant , dat hi soude pleghen , gheliic een op~gheseten laet pleegt inder vriheyt van Walem . ende hir toe es ghesciet al datter toe sculdegh was te ghesciene metten vonnisse ende metten rechte , ende gheen poynt van rechte achter ghelaten . In orconde hir af ende overmids der beden der partyen vorghenomdt , so hebben wi , scepenen vorghenomdt , onsen ghemeynen zeghel ghehanghen ane dese letteren , in ghetughenissen der warheyt . ghedaen int jar ons heren doen men screef M CCC tseeventegh ende sesse opten derden dagh in junij .