Corpus Van Reenen-Mulder (CRM14): Oorkonde K325a37701

Wi , suster Margriete van Musene , abdesse van Rosendale bider gratien Goets , ende tcovent ghemeynlike vander selver stede , staende bi Waelhem , vander ordenen van Cystiaus , van den bisscopdome van Camerike , groeten alle die ghene , die dese letteren selen sien of horen lesen , met kennessen der waerheit , in onsen lieven Heere , ende doen te wetene , dat wij hebben ghegheven Lodewijc de Leppere , Heynric Leppers sone was , in erve twee huse metten hove die daer toe behoeren , die gheleghen sijn tusschen Jan die Kemmere aen die een zide , ende Jan Ymbrechts , scaelloetsmakere aen die ander zide . Welke huusinghe metten hove voergheseit , voertijts waren Jacob van Wackersele ende Stevens drayers , op eenen erfelecken chijs tiaers om . L . oude groete , half te betaelne te Kersavonde ende half te sinte Jans misse midden~zomer . ende om~dat wij willen dat dit vaste blive ende ghestadech si , so hebben wii dese letteren bezeghelt met onsen zeghel ende ons covents . Dese lettere was ghemaect int iaer ons Heeren , doen men screef M CCC ende LXXVII , op den tyensten dach vander maent van junio .