Corpus Van Reenen-Mulder (CRM14): Oorkonde K325a37702

Wi , scepenen van der vriheyt van Walem ghemenleke , saluut met kennissen der warheyt , doen cont allen lieden , dat comen es vore den drossate ons liefs ghemins heren van Duffle , ende vore ons , Katheline Niis , dochter van Liispt , met Wouteren vanden Kiele , haren ghetruden man ende gheleverden momboer metten rechte , ende hebben ghekent ende gheliit , dat si vercocht hebben witteleke ende wale , Clause Perniis also selken erfelecheyt , met siere toe~behoerten ende metten huussinghen die dar op steet , houdende omtrent drie buendere , metten gronde , luttel min ochte luttel meer , gheliic alse voertiits houdende was Mechghiel vanden Heestere , ende dar de vorseide Kateline haren tocht ane hadde , gheleghen des prochyaens goet van Walem ane deen side , ende tgoet van Nazareth ane dander side ende een half buendere lants metten gronde , luttel min ochte luttel meer , Cappoens kinderen goet in deen siide gheleghen , comende metten einde op de Beke . Welke vorseide erfelecheyt de vorghenomde Katheline , met Wouteren , haren momboer , by manissen des vorseids drossaten ende by onsen wiisdoeme , in des drossaten hant op hebben ghedraghen , ende dar af verteghen met halme ende met monde , ende van alden rechte dat si dar ane hadden ochte hebben mochten , ende dat te Claus behoef vorghenomdt , en te siere wittegen oeyr ende nacomelingen , so~dat de vorghenomde drossate , by siere manissen ende by onsen wiisdoeme , in~dede ende in~erfde den vorghenomden Clause in dit vorghenomde goet , erfelec te besittene , behoudeleke altoes ieghewelken sinen rechte . ende heeft gheloeft de vorghenomde Claus , dat dit vorseide goet sal , pleghen allen dies rechts , dat dat goet sculdegh es te pleghene , ende tote here heeft gheploghen . ende hir toe es ghesciet al datter toe sculdegh was te ghesciene , metten vonnisse ende metten rechte , ende gheen poynt van rechte achter ghelaten . In orconde hir af ende overmids der beden der partyen vorghenomdt , so hebben wi , scepenen vorghenomdt , onsen ghemeynen zeghel ghehanghen ane dese letteren , in ghetughenissen der warheyt . ghedaen int jar ons heren , doen men screef dusentegh drie + hondert tseeventegh ende zevene , des disendaegs vore sente Jans dagh Baptisten , in midden~zomere .