Corpus Van Reenen-Mulder (CRM14): Oorkonde K325a37703

Wi , scepenen van der vriheyt van Walem ghemenleke ons liefs ghemins heren van Duffle , saluut met kennissen der warheyt . wi doen te wetene allen lieden , dat comen es vore den drossate ons liefs heren vorghenomdt ende vore ons , Godevardt Verenasselen , ende heeft ghekent ende gheliit , dat hi sculdegh es der costeryen van Rosendale , viertiene pont payments tsaeyrs erfelex tsiis , te ghildene ente betaelne tallen kerssavonde , also selken payment alse telken gheldaghe ghemeynleke in borsen gaen sal , ende dar men mede coept ende vercoept , op also selken erfelecheyt metten gronde , gheliic alse vortiits Roelant de Swerte , drossate ende rentmeester ons liefs ghemins heren vorghenomdt , terve gaf den vorghenomden Godevarde , ende gheleghen es inder vriheyt van Walem , Gerards goet vanden Bossche in deen side gheleghen , ende Daneel sBrieders goet in dander side gheleghen . Ware oec dat sake , dat men dese vorghenomde viertine pont payments niet en gave van jare te jare , gheliic alse vorgheseegt es , so soude iemen vander vorseyder costeryen weghen siin hant slaen ane dit vorghenomde goet , gheliic alse een vonnisse wisen soude . ende hier toe es ghesciet al datter toe sculdegh was te ghesciene , metten vonnisse ende metten rechte , ende gheen poynt van rechte achter ghelaten . In orconde hir af ende overmids der beden der partyen vorghenomdt , so hebben wi , scepenen vorghenomdt , onsen ghemeynen seghel ghehanghen ane dese letteren in ghetughenissen der warheyt . ghedaen int jar ons heren doen men screef M CCC tseeventegh ende sevene , des disendaegs na sente Lauwereys dagh .