Corpus Van Reenen-Mulder (CRM14): Oorkonde K325a37704

Wi , scepenen van der vriheyt van Walem ghemenleke , saluut met kennissen der warheyt , doen cont allen den ghenen die dese letteren selen sien ende horen lesen , dat comen siin vore den drossate ons liefs ghemins heren van Duffle , ende vore ons , de provisoers des Heylechs Geests van Walem , kenden ende liiden dat si terve hebben ghegheven witteleke ende wale , by rade , by consente , by wilcore ende by behete der goeder liede vander vriheyt van Walem ghemenleke , ende overmids profiit ende orbore des vorghenomds Heylech Geests , Clause Perniis ende sinen witteghen oeyr ende nacomelinghen , vergouden hofstat gheleghen inder vriheit van Walem , tusschen den goede dat toe~behorende es des prochyaens provende van Walem in deen side , ende Boeds Graven kinderen goet in dander side , also verre alst toe~behorende was den vorghenomden Heileghen Gheest van Walem , omme viere pont payments tsaers erfelex tsiis , te gildene ente betaelne den vorghenomden Heileghen Geest , tallen sente Bamissen , also selken payment alse telken gheldaghe ghemenleke in borsen gaen sal , ende dar men mede coept ende vercoept . tote welker vorseiden goede ende erfelecheyt metten gronde , de vorghenomde Claus comen es , ende ingheerft es metten vonnisse ende metten rechte . ende dar toe ghesciede al datter toe sculdegh was te ghesciene , ende gheen poynt van rechte achter ghelaten . ende heeft gheloeft de vorghenomde Claus , dat dit vorseide goet sal , pleghen allen dies rechts , dat dat goet tote here heeft gheploghen . In orconde hier af ende overmids der beden der partyen vorghenomdt , so hebben wi , scepenen vorghenomdt , onsen ghemeynen zeghel ghehanghen ane dese letteren , in ghetughenissen der warheyt . ghedaen int jar ons heren , doen men screef dusentegh drie + hondert tseeventegh ende sevene , des disendaegs na sente Mechghiels dagh .