Corpus Van Reenen-Mulder (CRM14): Oorkonde K325a38701

Wij , scepenen van der vrijheit van Walem , ghemeynlec , saluut met kennessen der waerheit . wij doen te weten allen lieden , dat comen es voer den drossate ons liefs gheminds heeren van Duffle ende voer ons , Dijne van Berghen , met enen montbore , die haren ghelevert werd metten vonnesse ende metten rechte , kende ende lijde dat si vercocht heeft wittelec ende wale Lijsbetten Paridaens , Arts ghetrude dochter van den Bossche , een viertele rogs tsiaers erfelecx pachts , goet ende custbaer , in twalef penningghen na den besten die viertele , ghelijc dat hi ter merct compt te coepe , te ghildene ende te leverne alle iare tsinte Jans misse binnen der vrijheit van Walem , waer dats die voerseide Lijsbet Paridaens , ocht haer witteghe ? ende nacomelinghe , + begheren ende altoes metter Mechelscher maten , ghelijckerwijs dat die voerseide Dijne van Berghen jaerlijcx heffende was ende erfelec sprekende hadde , op alzelken erfelecheit , als Jan de Draeyere voertijts ghecreghen hadde ieghen Gielijse den Wreede , dat es te wetene , huusinghe , hofstaden ende hovinghe metten gronde ende met haren toebehoerten , gheleghen in die rechte strate tusschen Dijnen erve van Berghen in deen side ende in dander side gheleghen tsherenstrate , daer men te Rosendale wert gaet . Waer oec dat zake , dat men desen voerseiden rogghe niet en gave van iare te iare , ghelijc als voerseit es , so soude die voerseide Lijsbetten Paridaens , ocht haer witteghe oyer ende nacomelinghe , haer hant slaen an dit voerseide goet , ghelijc als een vonnesse wijsen soude . ende si gheloeft , ware dat zake dat haren tgoet quame ter hant , dat si pleghen soude ghelijc als een opgheseten laet pleght onder onsen gheminden heere van Duffle voerseit . ende hier toe es ghesciet al datter toe sculdich was te ghesciene , metten vonnisse ende metten rechte , ende gheen poent van rechte achter ghelaten . In orconde hier af , so hebben wij , scepenen voer~ghenoempt , dese letteren bezeghelt met onsen ghemeynen zegle , in ghetughenessen der waerheit . ghedaen int iaer ons Heeren . M . CCC . tachtentich ende sesse , den dertienden dach van merte .