Corpus Van Reenen-Mulder (CRM14): Oorkonde K325a39001

Wy , scepenen van der vrijheit van Walem ghemeynlec saluut met kennesse der waerheit , wy doen te wetene allen lieden , dat comen es vore den drossate ons gheminds heeren van Duffle ende vore ons , Jan Gheens , Ard Gheens zone wijlen was , kende ende lijde dat hi terve heeft ghegheven wittelec ende wale , Janne van Bolloe ende Kathelinen vanden Voerde , sinen witteghen wijve , een huus ende hof metten lande daer neven gheleghen , houdende tsamen omtrent een boender , luttel min ofte meer , metten gronde ende met zier toebehoerten , ghelijc dat Ard Gheens wijlen houdende was ende bezittende , op achte viertelen rogs tsiaers erfelecx pachts , goet ende custbar , in twalef penninghen nae den besten die viertele , ghelijc dat hi ter merct compt te coepe , te ghildene ende te leverene alle iare te Kerssavonde binnen Mechele , waer dats die voerseide Jan Gheens , ocht ziin witteghe oeyr ende nacomelinghe , + begheren ende altoes metter Mechelscher maten . Waer oec dat zake , dat men desen voerseiden rogghe niet en gave van iare te jare , ghelijc alse voerseght es , so zoude die voerseide Jan Gheens , ocht ziin witteghe oeyr ende nacomelinghe , ziin hant slaen an dit voerseit goet , ghelijc als een vonnesse wijsen soude . ende hi gheloeft , ware dat zake dat hem tgoet weder quame ter hant , dat hi pleghen soude van dien goede , ghelijc als een opghezeten laet pleght onder miin heere van Duffle voerghenomt . ende hier toe es ghesciet alle datter toe sculdich was te ghesciene , metten vonnisse ende metten rechte , ende gheen poent van rechte achter ghelaten . In orconde hier af ende overmids der bede ende verzoecke van beiden partien voerseit , soe hebben wy , scepenen voerghenomt , dese letteren bezeghelt met onsen ghemeynen zegle , in ghetughenesse der waerheit . ghedaen int jaer ons Heeren doen men screef M . CCC . ende neghentich , sdonderdaghs naer sinte Jans dach Baptisten , in midden~zomere .