Corpus Van Reenen-Mulder (CRM14): Oorkonde K325a39101

Wy , scepenen van der vrijheit van Walem ghemeynlec saluut met kennesse der waerheit , wij doen te wetene allen lieden dat comen ziin voir den drossate ons liefs gheminds heeren van Duffle ende voir ons , Magriete van Arscot , wijlen was her Jans natuerleke dochter van Arscot priesters , met haren ghetrouden man , Diederijc van Molle , haren gheleverden montbore metten rechte , Janne Goesens , tot des goedshuus behoef van Rosendale , twalefd + alf pond payments ghemeyns borsghelds tsiaers , erfelecx chijs , te ghildene alle iare te Kerssavonde , op har huusinghe , hovinghe ende enen stuc lands , metten gronde daer neffens gheleghen , in die strate die men die Pijlstrate , ten einde vander voerseide straten , tusschen wijlen was Bouden Sleips wech in deen zide , ende Heinricx erve vanden Nestelere in dander zide gheleghen . Waer oec dat sake dat men desen voerseiden chijs niet en gave van iare te jare , ghelijc als voerseit es , zoe zoude die voerseide Jan Goesens ocht ziin witteghe oeyr ende nacomelinghe ziin hant slaen an dit voerseide goet , ghelijc als een recht ende een vonnesse wijsen soude . ende hij gheloeft , ware dat sake dat hem tgoet quame ter hant , dat hij pleghen zoude ghelijc als een opgheseten laet pleght onder miin heere van Duffle voerghenomt . ende hier toe es ghesciet alle datter toe sculdich was te ghesciene , metten vonnisse ende metten rechte , ende negheen poent van rechte achter ghelaten . In orconde hier af ende overmids der bede ende den verzoecke vanden partien voerseit , zoe hebben wy , scepenen voerghenomt , dese letteren bezeghelt met onsen ghemeynen zegle , in ghetughenessen der waerheit . ghedaen int jaer ons Heeren , doen men screef . M . CCC . ende neghentichter halver Sporkillen .