Corpus Van Reenen-Mulder (CRM14): Oorkonde K325a39301

Wij , scepenen vander vrijheit van Walem ghemeynlec , saluut met kennessen der waerheit , wy doen te wetene allen lieden , dat comen es voir den drossate ons liefs gheminds heeren van Duffle ende voir ons , mids des ghemeynen orbaere ende profijte des godshuys van Rosendale , Jan Goesens , als een voirganghere mids den wilcore , conscente ende bevele van mier vrouwen der abdissen ende des ghemeynen convents toe~doene vanden zelven cloestre voirseit , alzoe verre als daer trecht vermochte , kenden ende lijden alle ghezamenderhant , dat zij terve gegheven hebben wittelec ende wale , Willeme Hyndemanne , die men heet Willem dinghelscheman , enen beempt metten gronde ende met enen weghe vander herstraten dair toe weghende , ghelijc datter tfoirzeide godshuuys , ende dair te~voiren wijlen johannes Stoep houdende waren , ghelijc oec dat hij int Langcbroec @ gheleghen es , des voirseiden godshuuys goet noch van Rosendale in deen zide , ende wijlen was Wouters sWisseleren goet in dander zide gheleghen , op zesse gulden penninghe tsiaers erfelecx chijs , die men heet guldenen van Florensen , ofte die werden dair nae in andren goeden ghelde , te ghildene ende te betalene alle iare tsinte Mertens misse dien voirseiden chijs gheheel . ende omme der meerdere zekerheit wille , zoe heeft die voirseide Willem Hyndeman tenen gherechten onderpande ghezedt dien voirseiden Janne Goesens , tote des godshuuys behoef voirghenomt , dat namelijcke goet voirseit , ende dair toe alle die erfelecheit metten gronde , die de voirseide Willem Hyndeman houdende es in die rechte herstrate voirseit , gheleghen tusschen Jan Yrgods erve wijlen was in deen zide , ende Heinrijcx erve Vernaven in dander zide gheleghen , by alzelker condicien ende voirwaerden , dat die voirseide Willem Hyndeman , ziin oeyre ende ziin nacomelinghe beseghen ende ghebruyken zelen tallen tijden , dat zijs behoeven den sloet al omme , die tusschen des godshuys erve voirseit gheleghen es , ende den voirseiden beempt die Willem voirghenomt ieghens hen heeft vercreghen , dats te wetene , dair doere te waterene , te beseghene ende te ghebruykene ende te dykene , dair uut ende opt~sgodshuuyse cant , dan dat te legghene zonder den godshuuyse voirseit enighe scade te doene vander hoeghden vanden watere . Voirt zoe zelen Willem Hyndeman ende ziin nacomelinghe , dien voirseide godshuuyse ende haren nacomelinghen altijt dwater dore laten lijden tharen beempden , alzoe menich werf al~zijs behoeven . Toten welken beempde voirghenomt metten gronde ende met zier toebehoerten , in der manieren dat voirseit es , ghedaen ende ingherft es die voirseide Willem Hyndeman , by manessen ons drossaten voirseit ende by wijsdoeme onser scepenen voirghenoempt , ende hij gheloeft voir hem , voir ziin oeyre ende voir ziin nacomelinghe , van den goede voirseit , te pleghene alle ghebuerlec recht , ghelijc dat tgoet tote her toe heeft gheploghen , tallen scote ende lote te stan en_ ende tsheeren dienste . Wair oec dat sake , dat die voirseide Willem Hyndeman , ocht yemant van zier weghen , hier ieghen yet daden ochte daden doen met enigher poirterien , enigher clergien ocht met enigher vrijheit , hij en plaghe van den voirseide goede ghelijc als voirseit es , zoe heeft hij ghewil~coirt ende over~ghegheven , dat die grond des goeds goeds voirseit verboirt es , tote ons liefs gheminds heren behoef van Duffle voirghenoempt . ende hier toe es ghesciet al datter toe sculdich was te ghesciene , metten vonnisse ende metten rechte , ende gheen poent van rechte achter ghelaten . In orconde hier af ende overmids den verzoecke ender bede van den partien voirseide , zoe hebben wy scepenen voirghenoempt , dese letteren bezeghelt met onsen ghemeynen zegle , in ghetuyghenessen der waerheit . ghedaen int jaer ons Heeren doen men screef . M . CCC . neghentich ende drie , op sinte Martensdach .