Corpus Van Reenen-Mulder (CRM14): Oorkonde K325a39501

Wy , scepenen van der vryheit van Walem ghemeynlec saluut met kennessen der waerheit , wy doen te wetene allen lieden , dat comen es voir den drossate ons liefs gheminds heeren van Duffle ende voir ons , Bonijn Byc , lombard van Ast , kende ende lijde dat hij vercocht heeft wittelec ende wale Bleneyer Bens , alle dat recht dat hij hadde ocht namaels hebben mochte , ane al~zelke goede ende alle dier erfelecheit , die wijlen Claus Pernijs , ziin oem , houdende was binnen der vrijheit van Walem , ghelijc dat se hem bleven ende verstorven ziin van Clause , zijnen oem voirseit , dats te wetene , huusinghe , hovinghe ende land , metten gronde , gheheyten Bystervelt , houdende tsamen omtrent vierd + alf boender , luttel min ofte meer , ghelijc dat die zelve voirseide Claus Pernijs houdende was , onder onsen gheminden heere voirseit . Toter welker voirseide erfelecheit met~ten gronde ghedaen ende ingheerfdt es die voirseide Blengyr Bens onse mede~poertere by manesse ons drossate voirseid ende wijsdomme onser scepenen voirghenoempt , te houdene ende te hebbene met allen dien condicien ende vorwarden , die in desen ouden brief , dair dese nuwe brief dore ghesteken es , ghescreven staen . ende hier toe es ghesciet alle datter toe sculdich was te ghesciene , metten vonnesse ende metten rechte , ende gheen poent van rechte achter ghelaten . In orconde hier af ende overmids den verzoecke ender bede van den partien vorseid , zoe hebben wy , scepenen voirghenoempt , dese letteren bezeghelt met onsen ghemeynen zegle in ghetuyghenessen der waerheit . ghedaen int jaer ons Heeren doen men screef . M . CCC . neghentich ende vive , op den tienden dach in oegxt .