Corpus Van Reenen-Mulder (CRM14): Oorkonde K325a39801

Wy scepenen van der vryheit van Walem ghemeynlec saluut met kennessen der waerheit , wy doen te wetene allen lieden , dat comen es voir den drossate ons liefs gheminds heerscaps van Duffle ende voir ons , Heinric Hermans , van Rethye , kent ende lijde dat hij vercocht heeft wittelec ende wale , Ghijsbrechte van Stakenboirch , tot des godshuus behoef van Rosendale , twee guldene penninghe , die men heet Brabantsche mottoenen , goet ende gherecht van goude ende zwair van ghewichte , ochte altoes die werde dair nae in andren goeden ghelde , tsiaers erfelecx chijs , te ghildene ende te betalene , deen helft tallen sint Jans daghen Baptisten , alle iare in midden~zomere , ende dandere helft tallen Kerssavonde , dar naest volghende , ghelijc datten die voirseide Heinric harmans voirtijts ghecocht ende ghecreghen hadde van dien voirseiden erfeleken chijs , ieghens Machiele vanden Heestre , op alzelken pand ende onderpand , als dese oude brief , dair dese nuwe doer ghesteken es , wale begrijpt , behoudelec altoes den voirganghe van tsheeren chijse , die hij iaerlijcx dair op heffende es , te houdene ende te hebbene met allen dien condicien ende voirnwaerden , die in desen ouden brief , dair dese nuwe brief dore ghesteken es , ghescreven staen in der formen foirseit . ende hier toe es ghesciet alle datter toe sculdich was te ghesciene , metten vonnesse ende metten rechte , ende gheen poent van rechte achter ghelaten . In orconde hier af ende overmids den verzoecke ender bede van den partien voirseit , zoe hebben wy , scepenen voirghenoempt , dese letteren bezeghelt met onsen ghemeynen zegle in ghetuyghenesse der waerheit . ghedaen int jaer ons Heeren , doen men screef dusent drie + hondert neghentich ende achte , tingaende septembre .