Corpus Van Reenen-Mulder (CRM14): Oorkonde K325a39901

Allen den ghenen die dese letteren zelen zien ocht horen lesen , scepenen vander vrijheit van Walem ghemeynlec saluut met kennessen der waerheit , wy doen te wetene allen lieden , dat comen es voir den drossate ons liefs gheminds heerenscaps van Duffle ende voir ons , Blengier Bens , lombart , kende ende lijde dat hij vercocht heeft wittelec ende wale Janne van Berct , alle die erfelecheit metten gronde , ende alle dat recht dat hij dair ane hadde ocht namaels hebben mochte , ane alzelken goet als gheheyten es tgoet te Bystervelt , ghelijc dat die zelve Blengier Bens voirseit , dit voirseide goet voirtijts ghecocht ende ghecreghen heeft ieghens Boniin Byc , enen andren lombart , dat die bezeghelde scepenen~brieven van Walem dair op ghemaeckt wale verclaren , dats te wetene huysinghe , hovinghe ende land metten gronde , houdende tsamen omtrent vierd + alf boender luttel min ofte meer , ghelijc dat wijlen oec Claus Pernijs houdende was , gheleghen neffens den prochiaen van Walem . Vander welker erfelecheit voirseit ende alle dien rechte , dat hi dair ane hadde , verteghen ende uutghegaen es , die voirseide Blengier Bens , ghelijc als een recht ende een vonnesse wijsde , behoudelec Heinricx tocht vanden Vivere ane dese voirseide goede , alzoe langhe als hij leeft ende niet langhere Toter welker erfelecheit in der manieren voirseit ghedaen ende ingherft es die voirseide Jan van Berct , by manessen ons drossaten voirseit ende by wijsdomme onser scepenen voirghenoempt . ende Jan van Berct gheloeft voir hem , ziin oeyre ende voir ziin nacomelinghe , te pleghene vanden voirseide goede alle ghebuerlec recht , ghelijc dat tgoet tot har toe heeft gheploghen , tallen scote ende lote te stan en_ , ende tsheerenscaps dienste voirseit . Wair oec dat sake dat Jan van Berct , ocht yeman van zier weghen , hier teghen yet daden met enigher poirterien , eningher clergien , ocht met enigher vrijheit , zij en plaghen van den voirseide goede als voirseit es , zoe heeft hi ghewilcort ende overghegheven die zelve Jan van Berct voirseit , dat die grond vanden voirseiden goede , verboirt es tsheerenscaps behoef van Duffle voirghenompt . ende hier toe es ghesciet alle datter toe sculdich was te ghesciene , metten vonnesse ende metten rechte , ende gheen poent van rechte achter ghelaten . In orconde hier af ende overmids den verzoecke ende der bede vanden partien voirseit , zoe hebben wy , scepenen voirghenompt , dese letteren bezeghelt met onsen ghemeynen zegle in ghetuyghenessen der waerheit . ghedaen int jaer ons Heeren doen men screef . M CCC neghentich ende achte , op den tienden dach in sporkille .