Corpus Van Reenen-Mulder (CRM14): Oorkonde K325a40001

Allen den ghenen die dese letteren zelen zien ocht horen lesen , scepenen vander vrijheit van Walem ghemeynlec saluut met kennessen der waerheit , wy doen te wetene allen lieden , dat comen es voir den drossate ons liefs gheminds heerenscaps van Duffle ende voir ons , Jan van Berct ende heeft mids famen wille van andren brieven , ocht enighen rechte dat yemant hebben mochte ane tgoet te Bystervelt , anders dan dese oudere brief , dair dese nuwe dore ghesteken es , heeft begrepen . Voirt doen eysschen ghelijc als een recht wijsde , alle dieghene die hen enichs rechts vermeten wouden opt goet van Bystervelt voirseit , ende , want die voirseide Jan van Berct dat voirseide goet hoede ende wachte den enen dach ende te ghenechte , ende op sinen iersten dach ghelijc als een recht ende een vonnesse wijsde , ende van den iersten daghe op den andren , ende van den andren op den derden , ende van den derden op den vierden ter noetzake , ghelijc dat een recht ende een vonnesse wijsde . ende want dair nyeman en quam , die dat voirseide goet verantwerden ocht enighe ane~sprake dede , ocht doen woude in den rechte ieghens Janne van Berst voirseit , zoe heeft die voirseide Jan van Berct verreyct , vervolght ende uutghewonnen bij manissen ons drossate voirseit , dat voirseide goet van Bystervelt , ghelijc sinen propren goede , ende by wijsdomme onser scepenen ghemeyne voirghenoempt , te houdene ende hebbene met allen dien condicien ende voirwaerden die in desen andren brief , dair dese nuwe brief dore ghesteken es , ghescreven staen . ende hier toe es ghesciet alle datter toe sculdich was te ghesciene , metten vonnesse ende metten rechte , ende gheen poent van rechte achter ghelaten . In orconde hier af ende overmids den verzoecke ender bede vanden partien voirseit , zoe hebben wy , scepenen voirghenoempt , dese letteren bezeghelt met onsen ghemeynen zegle in ghetuyghenessen der waerheit . ghedaen int jaer ons Heeren doen men screef . M CCC neghentich ende neghene , op den vijftienden dach van aprille .