Corpus Van Reenen-Mulder (CRM14): Oorkonde K358p36001

Wi arnout daeniels van scoenloe voecht des greven van loen / johan van widoe meyere des proefsts van widoe / johan boeghaert / heinric creite / matheus der hoevenere / jacob buesrogghe / cristiaen der scoesutere / heinric der smet / ende arnout ommaete scepene_ van binnen der vriheit / johan van creienest / johan heinrics van merleberghe / willem voeren lijsbette_ sone / wouter van der vaernt / heinric van den houte / ende arnout badeloeghe / scepenen van buten der vriheit van beringhen / doen cont allen den ghenen die desen jeghenioerdeghen brief sien soelen ochte hoeren lesen / dat voer ons comen es in propren persone heinric die mer heit van den laere der oudste / ende bekende dat hi vercocht heeft der pitansien van herkenrode / tiene cleine guldene / goet van goude / ende van gherechten ghewichte / ochte drie oude scilde goet oec van goude ende gherecht van ghewichte / voere vire guldene / ochte de weerde daer af in andren goeden payminte gherekent / jaerlijcs en_ omm_meer in sinte gertruden daghe / te half meerte / te betaelne ende te leverne / omme ene sekere summe van ghelde die heme wettelike ende al~te~maele betaelt es alse hi selver voer ons liet ende vergouden / Voere welke tiene guldene voere~gheseit / die voere~gheseide heinric heeft gheset te onderpande diere voere~gheseder pitansien ende gerarde den quaden alse mu_bore diere selver pitansien ende te hoerre behoef / voer ons scepenen van binnen / die scure metten gronde daer hi binnen woent / oec met den grachte diere ane gheet / ende allet dat heme toe~behoert in den hof te grune_dale / voert dat winnechtech lant dat voere den hof leghet alsoe alset hem toe~behoert / dat es van den mampade dire over gheet / die side ter ouder borch wert / voert sinen cleinen wier die naest leghet der bruelmoelen / die wilneer was voeren sophien / met allen sinen soefoeren die over die beke ligghen / alsoe verre alse si heme toe~hoerende sijn / voertmeer oec sinen beemt die gheleghen es acht_ langhen~eyken / die mer heit ghene windebeemt die hout onder + half bunre . luttel miin ochte luttel meer / die oec gheleghe_ es bi de hoeve joncvrouwen mechtelden van boect / Ende voer ons scepene_ van buten voere bescreven heeft hi daer bi gheset te onderpande der selver pitansien / sinen wier die gheleghen es achter sanstraeten / die wilneer was ghijsbrechts van langhen~eyken / met tween cleinen wierkenen die daer neder ligghen te johans wieren wert va_ ham_e / en_ allet dat daer toe hoert / ghelijc dat hijt daer houdende es / Jn welke onderpande die voere bescreven sijn die selve heinric heeft ghegoet den voerghenoemden geraet den quaden alse momboere der voere~gheseder pitansien ende te hoere_ behoef / ende daer toe ghedaen alse mer sculdech es te doene / met menisse / met v_tienisse / met gichte_ / met ban_e ende met alle von_isse ghelijc dat onse hove te rechte hebben / behoudelec alremanlijcs recht / Met deser voerwaerden / were dat sake dat die voerghenoe_de heinric ochte sine naecoemelinghe d_ voere~ghenoemder pitansien dese voere~bescrevene tiene guldene te desen voere~ghesprokene daghe niet en vergulden nochte en betaelden / dat dan die voere~ghenoemde pitansie / ochte man van hoere_ weghen / hoere hant ane alle dese voere~bescrevene onderpande slaen sal / en_ daer toe vaen / alse te hoeren p_pren erve / alse onse hove hoere wisen soelen / ende si te rechte hebben / voertmeer soe heeft oec gheloeft ende ghewilcoert / die selve heinric voer heme ende sine naecoemelinghe / were dat sake dat die wiere achter sanstraten die boven bescreve_ sijn quemen ende vielen in der hant der pitansien voere~bescreven / ende si quemen te_ erve / dat dan die selve pitansie / ochte man van hoeren weghen soude ende mochte altoes die beke leiden in die selve wiere dore heinrics erve voere~gheseit / alsoe alsi nv gheet / weert doer leengoet / ochte weert doer sijsgoet / alse dicke alsijs begheerde_ en_ oec te doen hedden sonder anesoeken ochte weder~segghen van iemanne / voertmeer so heeft oec gheloeft ende ghe~wilcoert geraet d_ quade alse mo_bore der pitansien voere~bescreven / en_ van hoerre weghe_ met wille des pitansimeest_s va_ h_kenrode dire bi stoent / were dat sake dat dese onderpande die voere bescreve_ sijn te hen quemen / en_ in hoere hande vielen / dat si dan met dien van beringhen bede en_ tsijs recht ende cromp gelden souden ghelijc hoere_ reenghenoeten sonder weder~segghen / Voertmeer so heeft gheorloft ende heeft oec v_leent voer ons / die voere~ghenoemde geraet de quaede alse mo_bore d_ pitansien voere~ghenoemt / met wille en_ co_sente des pitansimeesteers die daer bi en_ ane stoent / dat joncvrouwe lijsbet van papenbroec van desen tien guldene_ die voere bescreve_ sijn sal op~houden jaerlijcs vijf guldene der moente_ voere~ghesproken / alsoe langhe alse si leeft / maer nae hoere doet / soe soele_ si bliven der pitansien eerfelike / voertmeer joncvrouwe marie van ludeke sal op~houden jaerlijcs va_ dien selven tien guldene_ / ende in der selver moenten / twee guldene / alsoe langhe alsi leve_ sal / maer nae hoere doet / soe soelen si oec bliven eerfelike der pitansien voere~gheseghet / voertmeer joncvrouwe kath_ine soeckers sal oec op~houden die andere drie guldene jaerlijcs alsoe langhe alse si leeft / ende nae hoere doet / so soelen si blive_ joncvrouwen beatricen en_ joncvrouwe_ margriten acht scillincs alsoe lange alse si beide leven soelen jaerlijcs op te houdene / maer nae hoere drire doet soelen si oec bliven ter pitansien voere~gheseit eerflike te houdene / ende te besittene / Ende want dese dinghe / ende dese voerwaerden die hijr voere bescreve_ sijn alsus voer ons ghescieden / ende gheordeneert woerden / en_ want wi scepenen van buten voere~bescreven en~ghene p_pre sighele en hebben so bidde wi onsen lieven vrienden den scepenen van binnen der vriheit van beri_ghen dat si hoeren ghemeynen sighel ane desen brief doen hanghen voer hen en_ voer ons in orcunde en_ / ghestedecheit der waerheit Ende wi scepene_ van binnen der vriheit van beringhen omme der beden wille onser liever vriende der scepenen van buten voere~bescreven / ende oec voer ons selven / ende oec der beden beide der p_tien / so hebbe wi onsen ghemeynen sighel aen desen brief doen hanghen in ghetughenisse der waerheit / ende ghestedecheit der dinghen die boven sijn bescreven / Gegheven jn jaer der gheboerten ons heren / doen mer screef / dusent / + drie + hondert en_ sestech des sevendes daechs van loemaende . dat woert / ons dat boven ghescreven es / dat opp_bere wi / Gegheven alse boven ghescreven es / . die rasure_ te vier + stade_ / alse geraerde / geraert / geraert / geraert / die app_bere wi oec gegheve_ alse boven . -