Corpus Van Reenen-Mulder (CRM14): Oorkonde K523r36901

@ @ Alle den ghenen die desen brief zellen zien of horen lesen doe ic verstaen Claes die edel scoute in lopic in der heren @ gherechte van zinte marien dat voor mi voor die landghenoten ende voor de bure de hijr beneden bescreuen staen ghecomen is jnt + gherechte joncfrou mechtelt mit horen rechten voecht henric willam haessen sone horen zone ende belyede @ daer mit horen vryen wille dat joncfrou mechtelt ziin moeder ende hoor kynderen voertiids ghisebrecht ver + wendelmoeden @ zone enen eyghendom ghegheuen hadde van enen morghen lands alse hi gheleghen is in lopic onderdeel in eenre viertel lands mit horen kynderen daer dyrc van houdaen boven naest ghelant is ente heren van zinte marien beneden welc morghen lands voorscreuen baudekiin van rutenberch ontfanghen heeft van ghisebrecht voorscreuen Ende @ henric voorscreuen belyede mit sinen vryen wille dat joncfrou mechtelt ziin moeder versumet hadde alle loseninghe ende erfpacht de zi daer aen hadden Ende joncfrou mechtelt ende henric voorscreuen scouden quiit al recht @ dat zi daer an hadden tot baudekiins behoef voorseyt Ende gheloefde hem mede daer nvmmermeer hinder noch @ kommer aen te + doen in enigherwiis Doe dat ghedaen was doe gaf baudekiin voorseyt joncfrou mechtelt @ voorscreuen den voorscreuen morghen lands te + bruken tot enen eweliken erfpacht Elx iaers om vier pont alsulx @ paeyments alse tutrecht ghenghe ende gaue is daer de ene coman van + den anderen mede coomt in elker @ tiid der betalinghe te + betalen vry ende kommerloos te + leueren binnen vtrecht die ene helft op zinte martiins dach @ in den winter nv naest comende ente ander helft op zinte peters dach ad Cathedram daer naest comende of binnen eenre maent na elken termine voerseyt onbegrepen Ende also voert iaerlix erflic ende ewelic Mit zulken @ vorwaerden waer dat zake dat joncfrou mechtelt voorscreuen of hoor erfnamen ofte nacomelinghen desen pacht iaerlix nyet en betaelden tot elken termine in allen manyeren alse voorscreuen is zo vallen zi van desen erfpacht ende @ claerlike van allen rechte ende toesegghen dat zi hadden aen den voorscreuen morghen lands Ende so coomt de voorscreven morghen lands weder vry ende los an baudekiin van rutenberch ende an sinen erfnamen ende nacomelinghen @ horen vryen wille daer mede te + doene zonder yemants weder~zegghen also verre alse ziit opnemen willen ende @ anders nyet ende behouden hem vmmer al hoors versetens pachts hiir waren ouer ende ane daer dit ghesciede @ gheriid eliaes zone jacob van + den damme willam daem jacob lambrechts zone landghenoten ende bure in den gherechte voorseyt ende anders vele goeder lude Ende op~dat dit vast ende stade bliue so hebbe wi Claes die edel scoute @ gheriit eliaes sone jacob van + den damme alse landghenoten ende bure voorseyt onse zeghellen an desen brief @ ghedaen tenen oorconde Ende wi + Willam daem ende jacob lambrechts zone landghenoten ende bure voorseyt kennen @ ende tughen dit onder deser voorghenoomder zeghellen want wi hiir mede ouer ende ane waren daer dit @ ghesciede alst hiir voor bescreuen staet Ende ic baudekiin van rutenberch hebbe minen zeghel mede an desen brief @ ghedaen want ic dat kenne ende lye dat alle dese punten ende vorwaerden voorscreuen aldus ghesciet ziin alst @ hiir voor bescreuen staet ghegheuen jnt iaer ons heren dusent dre + hondert neghen ende tsestich des sonnendaghes voor zinte martinus dach in den zoemer