Corpus Van Reenen-Mulder (CRM14): Oorkonde K602r30501

Wi Richt_ / Scepene / Raet en_ die ghemeene poert van woudrichem Maken cont en_ kenlijc mett_ waerheit / alle den ghenen die desen brief soelen sien en_ horen lesen . Dat h_ gheraert onse here die here van horne en_ van althena / dat huus te ghieten dat hem die g_ue van ghelre tenen ond_pande gheset hadde alse vore sine ghevanghen wittelike en_ wale hilt in alle dien voerwaerden dat hem gheset was tehent diere tijt dat h_ hugheman van ghieten en_ sine knapen namen onsen port_en van woudrichem en_ vp onsen here / achte en_ Tuintich hoeft~vers ende Tien v_ken en_ dat was acht daghe voer dien dach dat huus van ghieten te~broken wart . en_ dat betoende onse here van horne den g_ue van ghelre . en_ daer af en wart hem gheen bericht . en_ want hem daer af gheen bericht en wart / dede hi sinen wille met sinen ond_pande alsoe alse sine voerwaerden waren . jn orconde van desen brieue beseghelt met ons_ ghemeenre poert seghele . en_ ghegheuen int jaer ons heren . Dertien hond_tich jaer en_ viue des vrien~daghes voer onser vrouwen licht~misse .