Corpus Van Reenen-Mulder (CRM14): Oorkonde K602r31301

Wj jan de pape Claes vten Campe . Claes andries sone peter lens en_ jan de hoghe scepenen tot wouderechem maken cont en_ kenleke allen den ghenen die desen brief Selen Sien en_ hoeren lesen met kennissen der waerheit dat wi dar over gheroepen waren alse scepenen / dat en edel man onse lieue h_e mijn h_e van horne en_ van althena en_ van per?weis / en Seggen ane (onleesbaar) nam tusschen tvee partien die gheuochten hadden te wouderechem / dats te verstane dene partie / willem de hoghe en_ honelman en_ al hore help_en ane dene side en_ boudene van + den worpe en_ Sine help_en ane dander Side / en_ beide dese partien en_ hore help_en verborghet hebben en_ versekert elc voer tsine in ghesamender hant en_ onghescheiden en_ kennen dat onse h_e van hoerne voerghenompt / Sijn Seggen gheseit heeft met alsulken worden alse hier na ghescreuen staen / . Wi Gheraert h_e van hoerne van althena en_ van pereweis maken cont allen den ghenen die desen brief Selen Sien en_ hoeren lesen met kennisse der waerheit / dat willem de hoghe / en_ hoenelman en_ al hore help_en ane ons bleuen Sijn van enen tvie en_ vechtene die gheuallen es tusschen willeme en_ hoenelmanne en_ horen help_en ane dene side / en_ boudene van + den worpe en_ sinen help_en ane dander side / welc tvi en_ vechten gheschiede des manendaghes na belokenen paesken dat naest leden es / en_ wi ons daer op versien hebben en_ beraden met onsen maghen / met onsen mannen en_ met onsen vrinden Soe Segge wi onse Seggen bi alsulker waerheit alse wi vernomen hebben van goeden lieden en_ wittachteghen en_ bi horen ede / dat willem en_ hoenelman en_ hore help_en voerghenompt jeghen ons en_ jeghen onse heerlicheit met houerden ghedaen hebben in onser port van wouderechem dat wi verbetert willen hebben en_ Seggen / Dat willem en_ hoenelman en_ alle hore help_en voerseit ons gheuen Selen tvee hondert pond en_ vijftech pond / Enen groeten ouden Conincs tornoysen voer sestien penninghe of payment daer jeghen alsoe goet / te gheuene en_ te betaelne / Half te Sente mertens misse naest toe~comende / en_ dander helft te kersauonde daer na naest volgende hier af Selen gheuen / willem de hoghe en_ Sine tvee sonen / jan en_ Gheenhen tsestech pond aert hoenelman tvintich pond jan hebrechts sone tvintech pond / godeken Sijn brueder ellef pond / jan van + der eme en_ sine sone Claes vijf pond / Clauwaert de smet en_ Claes sijn sone tvee pond / vranke de meersman en_ noyde Sijn Sone Sestien pond / Claes boudekens sone tien pond / henne hebrichts sone van + den zande en_ jacop en_ andries sine brued_e tvintich pond kerstiaen van + der vischen tvee pond / ghibe van + der haren een pond / lammeken Sijn neve en pond / Coppeken van ghaueren drie pond / willem ocken Sone vijf pont / jan Gherards sone van Eten tvee pond / claes wout_ holen Sone vijf pont / jan / sander en_ willem Geerborghen kinder drie en_ dertech pont lammeken belen Sone Ses pond herman rutinc tvee pond hebrecht lansh_en sone tvee pond / jacop andries sone tien pond ? h_en Gilijs papen sone vijf pond / ? heermans sone en pond / jacop vten gasthuze en pond diederic Sijn brueder en pond / Ghod? riebrecht en pond tielman jan riebrichts sone vijf pond / waert dat Sake dat men ons dese voerghenomde som_e van gelde niet en ghaue ten voerseiden daghen Soe mochte wijt te coste winnen te lombaerde dat pond om_e viere penninghe de weke tot ons selues Seggens en_ alse wi daer niet langher in staen en willen Soe Selen + se ons quiten beide van coste en_ van hoestole / en_ deden Sijs niet Soe Souden si in~comen tot onser maninghen of ons ghewarechs boden te wouderechem te leistene op horen eighenen cost in ene herberghe die onse bode hen wisen sal / en_ niet wt te scheidene sine hebben ons ghequijt beide van coste en_ van hoestole / en_ alsi vertinnacht gheleist hebben Soe moghe wi ons doen rechten ghelijc dat wi ons van verboernessen doen rechten / voert Soe is onse Seggen dat alle die borghen die besegelt Sijn onder der scepene zegele / doe wi tseggen ane ons namen borghen Selen bliuen in ghesamender hand en_ onghescheiden / voert Soe es onse Seggen / dat willem de hoghe en_ hoenelman en_ alle hore help_en voerseit versoent Selen Sijn jeghen boudene van den worpe en_ sinen help_en eweleke en_ vmmermeer / waert dat Sake dat yeman van desen voerghenomden partien en_ horen help_en onse Seggen of onse zoene brake die hadde verboert Sijn lijf en_ Sijn goet / en_ waert oec alsoe dat yeman van desen voerghenomden partien heme becroende dat zoene op heme te~broken ware dat Soude staen tot onser prouinghe / weder si te~broeken ware of en ware / en_ ware si te~broeken dat Soude wi doen bet_en tot onsen goetdinkene / nochtan Soude dese zone vast en_ stade bliuen / Om_e~dat wi scepene vorseit daer over gheweest hebben daer alle dese voerscreuene stucken gheschieden Soe hebbe wi onse segele ane desen brief ghehanghen in orconscape en_ vestinesse alre dinc / dit waert ghegheuen int jaer ons h_en ?ent / + drie hondert en_ dertiene in Sente jacops daghe ~ ~ ~