Corpus Van Reenen-Mulder (CRM14): Oorkonde K602r32201

Wi jan briens sone / bernt die smit / gheraet peter leens sone / gheraet haec / willem wisse / en_ ghisebrecht van riede scepen tot woudrich_ orconde_ met desen brieue beseghelt met onsen seghelen / dat voer ons quame_ alse voer scepen / jan van groesebeec / arnt van croenstein / didderic die borchgraeue / jan siin sone / willem van striene / en_ hughe volprechts sone en_ ghelouede_ met ghesamender hand alse sakewoude / enghebrechte van andle / tot willems behoef van hoerne / van der tiende van der werken / tusschen irics wal en_ wouter heyen sloet gheleghe_ / twee hondert pont / en_ twintich pont suart_ torn_ den goeden grote_ coni_cs torn_ te payen voer sestien pe_ninghe ofte payment daer voer also goet en_ te gheldene die een helft tot paeschen en_ die and_e helft tot_ ghietenre merck die nv naest comende Sijn jn maniren alse hijr na bescreuen is dat willem van hoerne die voersp_ken tiende anespreken sal en_ kalengieren voer paesche_ nv naest comende / en_ waer dat sake dat willem voerseeght die tiende wonne met rechte voer paesche_ so sal hi dit voersproken ghelt op~heffen / waer oec dat sake / dat hi die tiende voer paesche_ niet en wonne / en_ dat bleue in deedinghe / en_ in vo_nisse / so~dat dese voersproken daghe van desen ghelde leden / so mocht jan van groesebeec dit voersproken ghelt op~heffen / maer dese sakewoude souden voert bliuen in die gheloeft van desen ghelde tot dire tijt dat gheeindt ware met rechte en_ met vo_nisse / wonne willem van hoerne voerseeght die voersproken tiende met rechte en_ met vo_nisse / so selen si hem dit voersp_ken ghelt gheue_ des ander + daghes en gauen si hem dat ghelt dan niet / so selen si he_ twiscat pande gheue_ va_ hore_ ghereetsten goede daer hiet bewisen mach / en_ die sijn eighen te bliuene / waer oec dat sake dat willem va_ hoerne die tiende niet en wonne alse voerscreue_ is / so selen jans borghe_ va_ groesebeec / voerseeght / quite sijn va_ desen ghelde / waer oec dat sake dat willem van hoerne voerseeght dese voersp_ken tiende niet ane en sprake voer paeschen nv naest comende / so selen jans borghen van groesebeec voerseeght quite sijn van desen ghelde / en_ jan van groesebeec soude opheffen / En_ die houd_e des brieues is maenre des ghelts / Ghegheue_ jnt jaer ons h_en / dertien hond_t en_ twee en_ twintich des vriedaghes na sinte jans dach alse hi onthouet wart