Corpus Van Reenen-Mulder (CRM14): Oorkonde K602r36301

WI Godevaert die Rijke / Ende Roelof die taem / scepen tot woudrichem Orconden met desen brieue beseghelt met onsen seghelen / Dat Reyngout tielmans sone vten Campe / als Richter tot slewijc / brien van weyborch / Mathijs van muulwijc / wouter boekeleer peters sone / Maes ghisebrechts sone / ende Godevaert die vos als heemraet tot slewijc ane ons brochten dat si daer ouer waren als richter / ende heemraet tot slewijc / Dat heynric van hoekelem / her willem van risewijc ridder / brien van weyborch heemraet voerseid / ende heynric van den roeue op~droeghen / heren Jan here van hoekelem / Die helft van viertich merghen lants alsoe alsi gheleghen siin / / in den ghericht van slewijc / die gyelijs van ghellichems waren / Ende dat si vte diere helft van den voersproken viertich merghen lants ghebannet worden / Ende her Jan here van hoekelem voernoemt in / ende dat si daer op verteghen / ende verhalmeden daer na Op Tot siinre behoef / als vonnis der heemraet voers_ wisede dat Recht was / Voert quam heynric van hoekelem voers_ voer ons als voer scepen / ende ghelouede den voerghenoemden h_en jan here van hoekelem / die helft van den voersproken viertich merghen lants Te waren Jaer en_ Dach alse men erue sculdich is te waren binnen vrieheyden ende alle voerplicht / ende alle voerco_mere af te doen / behoudelike_ der nonnen Claes dochter was van ghellichem / twelf pont tsiaers die si heuet Op vijf merghen lants vte desen voersprokenen lande tot hoere lijftocht / Ghegheuen jnt jaer ons heren / Dusent drie + hondert / + drie en_ Tsestich / Des woensdaechs na Sinte willibroerds dach