Corpus Van Reenen-Mulder (CRM14): Oorkonde K635r37601

WJ symoen ghodeuaerts soen en_ willem hessels soen scepen in huesden tughen onder onse seghele dat Rutgheer die bloet van baerdewijc opdroech den deken en_ den capittel van huesden seuend + alue gheerde lants metter ty_meringe die daer op steet liggende in + de_ ba_ne van baerdewijc tuschen gielijs den verwer en_ jan nolden aen deen zide en_ rutgheer den bloeten aen dander zide streckende van + den hoeygraue ter zandingepade toe met dyke sloet mase en_ metten weteringen die daer metten rechte toe horen en_ daer op verteech rutgheer die bloet voersc_uen tots dekens en_ tots capittels behoef voersc_uen alse hem en~gheen rechte daer + aen te behouden en_ gheloefde den deken en_ den capittel voersc_uen dat voersc_uen lant metter ty_meringe die daer op steet te waren jaer en_ dach alse een eyghen erue en_ een volboden en_ dat heeft met hem gheloeft ghesame_der hand heyma_ siin soen en_ gheloefden den deken en_ den capittel voersc_uen alle voerco_mer af te doen die daer op js of comen mochte van horre weghen dien si metten rechte sculdich siin af te doen en_ Rutgheer die bloet gheloefde heyma_ sinen soen scadeloes te houden . hier na siin comen die deken ent capittel voersc_uen en_ hebben dit voersc_uen lant metter ty_meringe die daer op steet met dyke sloet mase en_ metten wet_ingen die daer mette_ rechte toe horen Rutgheer den bloeten voersc_uen weder opghedraghen tot enen rechten erftiinse ouer vijf pont pe_i_ge siaers enen goeden g_ten coninx tornoysen gherekent voer sestien pe_ni_ge of goet payment daer teghen erfeleken en_ alle jaer te ghelden tot sente lambrechts misse sonder dese sente lambrechts misse die naest toe~comende js Ghegheue_ int jaer ons h_en dertien + hondert en_ ses en_ tsouentich sdonredages na onser vrouwen dach te wtgaende oeghste .