Corpus Van Reenen-Mulder (CRM14): Oorkonde K641r33101

Wi Melys van Hezellaer , Gozwyn van Beke ende Claus van Hechel , scepen te Waelwyc , tughen met onszen uppenbaren zeghellen , dat voer ons was ghestaen Dideryc Denghe van Waelwyc , ende heit upghetraghen Ard tie + men heyt Bertoud Back van Westilborch , veertech schilling suard siaers in enen gherechtten erfcyns altoes ende ummermeer up zente Baven tach te + ghelten en + te betalen ; ende alle die scepen~letteren die Ard Ver + zoet wiven zoen , Ghoet heb zyn ziel , hadde van dezen voerzeyden erfcyns , ho ende dwat maniren dat Ard Zoet + wiven zoen voermaels dezen erfcyns ieghen Willem van + der Zyde~Winden hadde vercreghen ; welke voerzeyde veertech schillingghe sjaers die Willem hadde ghecoft up die hostad die gheleghen was westward neven die Nuesteghe die voermaels was Veuren Badeloghen , die + men hyt Vernen van Turnout gheliker wys alzo alsze die scepen~letteren die van dezen voerzeyden erfcyns up deze voerzeyde hostad ghemaeckt waren , begrepen hadden ende bevaen ; zodat Dideryc Dynghe up dezen voerzeyden erfcyns tote Ard Bertouds behoef heit verteghen voerdaen zo heit gheloeft Diderijc Denghe up hem ende up zyn ghoet Ard Berthout Back dezen voerzeyden erfcyns te waren iaer ende dach voer al die ghene die te + daghe en ten recht woudden comen ; ende daer + af te doen alle voercummer uitghenomen vif schillinghe suard siaers van dezen veertech schillinghen sjaers die Ard Ver + zoet Wiven zoen heit bezet in gherechten testament den persoen ende der kerken van Waelwyc , enen groten Tornoyzen gherekent in alle dezen voerzeyden cyns van + der munten van Franckryc voer zestyn penningghe oft dat Payment dat daer ghoet voer waer . Ghegheven op zente Merttens dach die gheleghen is in den winter , doe + men screef int iaer ons sHeren duzent drie + hondert ende en + en + derttech .