Corpus Van Reenen-Mulder (CRM14): Oorkonde K641r33401

Wy Gozewijn van Beke , Art Hubbelen ende Claus van Hechel , scepen in Waelwyc , maken cont allen luden , dat voer ons was ghestaen , Jan Ghoen van Oesterwyc ende Woutter Beyis van den Bosghe , ende hebben gheerft met vonnisze der scepen herren Diderijc den deken van der consilien van Beke , in tue gherden lans , die voermaels hadden gheweest Hillen die Moens , die gheleghen waren tusghen dijs convents tue gherden lans ende dijs persoens vijr gherden , van + der straten utegaende toter meren , zo dat dese voerzeyde Jan Ghoenne ende Wouter Beyis up dit voerzeyde erve tote herren Diderijx sdekens behoef hebben verteghen ; voerdaen zo hebben gheloeft al zaecwoudde ghezamerder hant ende onghescheyden up hem ende up hoer ghoet Jan Ghoenne , Wouter Beyis ende Ard Beyis zyn bruder desen voergezeyden herren Diderijc dit voerzeyde erve te + waren jaer ende dach voer al die ghene die te daghe en ten recht woudden comen ; ende daer af te doen alle voer~cummer hijr in mede verbonden ende gewilkoert dat desen voerzeyde her Diederijc dese deken dit erve heit onffaen nijt als een prelaet mer ghelijc enen leken man van desen tue gherden lans te ghelden scot ende schout ghelijc den ghebueren van Waelwijc voerdaen ; zo hebben gheliet Jan Ghoenne ende Wouter Beyis , dat hem Diderijc den ijrsten penning met den lesten heit betaelt , Jan Ghoenne ende Wouter Beyis , die houdden Ard Beyis van der waerscappen scadeloes . In kenniszen deser waerheyt zo heb wi scepen onsze uppenbaren zeghelle aen dese letteren ghedaen . Ghegheven up zente Pauels avondde dat hi hem bekeerde , doe + men screef int jaer ons sHeren dusent drie hondert ende vir + en dertech .