Corpus Van Reenen-Mulder (CRM14): Oorkonde K660r30801

Wij Raes heer van Liedekercke , van Breda ende van Boenlare , maken cont allen den + ghenen die desen brief soelen sien oft horen lesen , dat wy hebben ghegheven ende noch gheven , ende hebben bewisen ende noch bewisen den nonnen van Breda twee ende twentech pont suarter tornoyse of die werde dar af , voer uut te heeffen in onsen cynse tote Riseberghe des naest dages sinte Severyns daghe ende acht zeester rogs ende vier zeester ghersten jarlic , die wy bewiset hebben ende noch bewisen te heeffen ane Antoni van Okel , vyf zeester rogs ende twe zeester ghersten , ende op Gherarts goed van Tichghelt drie zeester rogs ende twe zeester ghersten : die gheve wy ende bewise wy hen erflike ende ewelike payslike ende vredelike te heeffen ende te besitten , ende utens ons tot haren behoef , ende gheloven hen dar + af een warant te wesen als in verorsatinghe van haren goede van Rosendale , dat houdet neghen ende twentech boenre oft dar bi . Ende omme~dat wy willen dese dinc vaste ende ghestade blive , so hebbe wy desen brief beseghelt med onsen zeghele , ende bidden onsen heren broder her Philipsen here van Ulvenhout dat hi desen brief med ons zeghele . Ende ic Philips van Lidekerke ridder , here van Ulvenhout , omme myns heren bede wille myns broder , seren van Liedekerke , van Breda en van Boenlaer voerghenoemt , ende omme~dat dese dinc die hiir voer bescreven staet , vast ende ghestade bliven sal , hebbe desen brief mede beseghelt med minen zeghele . Ghegheven int jaer ons Heren M . + CCC . + ende achte , des sonnesdages na sente Margrieten dach .