Corpus Van Reenen-Mulder (CRM14): Oorkonde K660r31401

Wi Philips , here van Liedekerke ende van Breda , maken cont allen luden dat Boudewiin Hermans sone van Steenberghen , Alsteen Godeverds sone van Berghen ende gheseillen ieghen ons hebben ghecreghen ende hebben ghecoft neghentiene hoven wilderden ende goed med al metten gronde , die gheheten es die vuchte ende ghelegen es tusscen der Tateringhen ende Amerberghe ende tusscen die ghemeente van Breda ende den utersten cant van + den waterlate , die men waterlaet van der Tateringhen heet , welke wilderde ende goed si ons wale hebben vergouden ende betaelt ende die voerseide wilderde ende goed also alsi gheleghen es ende wi se hen hebben doen meten onsen gesuoren lantmeter ende si begrepen hebben binnen haren putten ende binnen haren palen , die hebben wi Philips here van Liedekerke ende van Breda voers_ ghegheven ende gheven Boudewine , Alstene voerseit ende haren gheseillen ende haren nacomelinghen ende den ghenen diet ieghen ? ghecrighen al horen orbore mede te doene erflike ende emmermeer te hebben ende te ghebruken ende van ons ende van onsen nacomelinghen te houden med zeesse sceillinghen lovensce oft die werde daer ieghen van elker hoven elx iaers te rechten erfciinse te ghelden ende te gheven altoes te Breda op sente ? dach in den winter ; ende elke siin goed te vrien med sinen rechten cinse also groet als hi daer in ghegoed es ende onghecalengiert te sine van + den andren cinse . Vort hebben wi den voerghenoemden lieden ghegheven ende gheven ten voernoemden goede weech ende waterganc op donse te haren orbore ende nieman in haren waterganc te comen noch torboren ten si bi haren wille . Ende waert dat si weech ende waterganc behoveden op ander liede goed dat soude wi hem lieden doen hebben med haren redelliken cost . Vort hebbe wi hen ghegheven ende gheven erflicke drie gherachten ende dbedrief die op dit voornoemde goed te drie scellinghen , ende daer + beneden scoutaten te maken , te seitten ende tonsetten , coeren te maken ende ghebode te legghen te drie scellinghen ende daer beneden dit voernoemde goed mede te bedriven te haren orbore , ende dit mach hare scoutait richten met haren laten ; ende waert datter gherichten op vielen boven drie scellinghen , daer souden sie oft haren scoutaten toesien ende wachten tonsen behoef na hare beste sonder enech begriep van ons oft van iemanne tot~er wilen dat onse drossate oft onse scoutate van Breda daer toe quame . Voert gheven wi allen luden die op dit voernoemde goed wonen ende comen wonen vri te sitten ende quite van beden , van alrehande caelgien , van corueyen ende van hervarden , ten ware tonser lantwer daer siis vermaent worden ; maer ghevielt dat onse bede~lude quamen wonen op dit voernoemde goet , die souden ons dienst doen sonder arghehliste ende bede toe ghelden van haren goede dat buten desen voerghenoemden goede laghe . Ende desen voernoemden lieden Boudewine , Alstene ende haren gheseillen ende haren laten ende haren nacomelinghe gheve wi dit voernoemde goed vri van torftijnden ende in onsen lande , weghe , woide ende water onverseit op donse . Ende wi Philips here van Liedekerke ende van Breda voerseit hebben gheloeft ende gheloven voer ons ende voer onse nacomelinghe Boudewine , Alstene , haren gheseillen ende haren nacomelinghen hiir af goed warant te siene ; ende omme~dat wi willen dat dese dinc vaste en ghestade blive , so hebben wi desen brief bezeghelt uuthanghende med onsen zeghele . Ende bidden onsen broedere hare Zegher van Liedekerke , here van Boenlaer ende onsen lieven ghetrouwen luden van der porte van Breda dat si desen brief omme die merre sekerheit bezegelen met ons . Ende wi Zegher here van Boenlaer ende die ghemene porte van Breda overmids bede ons lieves heren tseren van Liedekerke ende van Breda ende omme die meerre zekerheit so hebben wi desen brief uuthanghende mede bezeghelt med onsen zeghelen , int jaer ons Heeren M . + CCC . + ende viirtiene des donresdaghes na sente Pauwels dach .