Corpus Van Reenen-Mulder (CRM14): Oorkonde K660r32701

Allen den ghenen di desen brief solen sien oft horen lesen , wi Ghilijs van der Boverien , Jan Zeghebregh sone ende Heinric Magerman , manne van den lande van Breda , maken cont dat comen es voer ons Andrys van Boymere ende heft op~ghedreghen den proest van den nonnen van Breda syn erve dat hi hadde in de Haghe ob de Bie ligend tusschen de woninghe des vorghenoems proes ende Jan Aes husinghe med allen sinen reghte dat hi daer hadde , oec so es comen voer ons Hughe Roefsone suagher des vorghenoemt Andrys ende heft verlyt dat dese voerghenoemt Andrys van Boymere quiten magh met X pont suarten den conigh tornosen over xvj . d_ een halster roecs jaerlycs dat dese vorghenomde Hughe heft ob de husinghe in de Haghe des vorghenomes proefs al soelc reght als dese vorgheseide Andrys in dat vorghenoemt halster roecs heft en voor ons betught es ; so heft dese vorgheseide Andrys ob~ghedreghen desen proeft voerghenoemt med allen reghte ; vort so syn comen syn twe doghtere Ghodelt ende Ojart med haren mombore ende hebben verteghen ob die herve ende ob dit halster roecs vorghenomt med allen reghte en van alre deser vorworden di voerghescreven es , ende dat hi oec putten ende palen wisen sal ; so es waerborghe Heinric Magerman voerghenomt ende want wi vorghenomde Ghilijs , Jan ende Heinric over dese vorworde di voer ghescreven es hebben gewest ende oec voer ons es gheantert med allen reghte , so hebben wi desen brief ghesegelt med onsen zeghelen . Ghegheven int jaer ons Heren dusent drie + hondert ende seven en + twintigh des ander dagh na sente Andrys daghe in den winter .