Corpus Van Reenen-Mulder (CRM14): Oorkonde K660r33102

Allen den ghenen die dese letteren selen sien ende hoeren lesen , ic Wouter van Nyspen , rentmeester van Breda , doe cont ende kenliic , dat ic van ons heren tshertogen weghen hebbe wetteleec vercocht , erfleec ute~ghegheven , ende ghelevert met der lant mate , Jacoppe Zuetrix eweleec te hebbene ende te besittene seventiene bunre heyden of wilderden in eenen stucke , ghelegen tusschen die Vucht van Breda ende der Aelst , in eene stede gheheeten Meerberghe ende Karnsberghe , ende daer omtrent , om seker voerlief mi wel betaelt van dien selven Jacop , op ses penninghe chiins van elken bunre alle jare te ghevene ; ende dat Jacob voerseit ende sine nacomelinghe alle dit goet moghen ende selen moghen inslaen , begraven , heymen ende gebruken na haren wille te eweliken tiden als haer proper erve ; ende dat die ghemeine wech sal gaen ende bliven gaende buten desen goede ter nort~side ter Aelst waert . In orconscap van desen hebbic minen seghel an dese letteren ghehanghen . Ghegeven int jaer ons Heren dusentech drie hondert ende eene ende dertech , op den derden dach van Wedemaent .