Corpus Van Reenen-Mulder (CRM14): Oorkonde K660r34901

Wy Reynoud Wyts sone ende Thomaes Michiels sone van Dorst , scepene in Baerle , orconden ende kennen med desen brieve dat voer ons quam Andries Wijts sone ende verlijde dat hi hadde vercoft om eene summe van penninghen die hem gheheelyc ende al betaelt ware mynre~vrouwen der priorinnen ende den ghemenen convente der nonnen van Breda , van der ordenen van Premonstreit , een sester rogs tsjaers erfpachts , goet ende custbaer , altoes te leveren tot Breda den vors_ convente med der maten van Breda ende tot onser Vrouwen lichtmisse als + men kersen draghet , op een halster rogs erfpachts die Andries vors_ heeft op die helft van Wouter Comans goede , dats te weten huus , hof ende scure med den hovinghen die daer toe behoeren ende op een halster rogs erfpachts die Andries vors_ heeft op Willem Keysers kyndre oude scure med den toe~behoerten die her Dierics was ende gheleghen es te Nihoven ende op + dat derdendeel van den molenacker , ende op thueesken van + der Ryt bi theidebloc , ende op thoveken tenden die scure ter heiden waert ; ende op die heininghe die Willem Blocs was , ende gheleghen es ter Hoebraken , aan deen side gheleghen Jan der Kyndre oestwert ende noertwert gheleghen Margriete Comans . In welken vors_ pacht ende goet myn vrouwe ende tghemene convent vors_ syn inghevest med vonnisse ende med rechte bi wysdom der gheenre die daer sculdich op waren te wisen . Oec so eest vorwerde dat Andries vors_ den nonnen vors_ altoes deze vors_ onderpande vrien sal med den heren cijnse . In kennisse der waerheit es dese brief beseghelt med onsen seghelen int jaer ons Heren doe + men screef M . + CCC . + veertich ende neghene des sondaghes voer sente Jans misse .