Corpus Van Reenen-Mulder (CRM14): Oorkonde K660r36201

Wy proesst ende priorinne ende ghemein convent van + den cloester van + den nonnen van Breda van + der ordenen van Premonstreit , van + den bisscopdome van Ludeke doen cont allen luden die desen brief sullen sien of horen lesen , dat wi omme nutscap ende orbore ons godshuus hebben vercoft twee buunre moers Janne Claes Molenaers sone die te Rosendale woent , omme eene summe van penninghen die hi ons al ende wittelec betaelt heeft , welke twee buunre moers gheleghen syn an de nort~side van + den langhen dyke , de eene buunre moers gheleghen neven Claes Molenaers moer an + de west~side ende an nort~ende gheleghen Sterken moer van Breda . Ende van + der buunre moers gheleghen an + de oest~side van Dirwien moere Jans Potters wyf was ende Gheertruden Van . + hult Vort es vorwyerde dat Jan vorseit bruken ende beseghen zal desen vorseiden moer dertich jaer lang ende niet langher ende ghelden sal tsheeren chyns dese vors_ dertich jaer lang : Dat es te weten vier enghels van + den buunre . Ende vaer oec dat sake dat dese vors_ moer niet ghesleten en worde binnen desen vorseiden jaren , so souden wi onse hande slaen an onse goet onverseit van iemende . In kennissen der waerheit so hebben wi proosst ende priorinne ende ghemein convent vors_ desen brief open bezeghelt met onsen zeghelen uuthanghende . Ghegheven int jaer ons Heeren als + men screef , dertien + hondert ende twee ende tsestich op + den elften dach in aprille .