Corpus Van Reenen-Mulder (CRM14): Oorkonde K660r36302

Wy Bartholomeeus Godscalx sone ende Jacop die Rover , scepenen in Breda ende mane tsheren van Breda , orconden met desen brieve dat voir ons quam Heinric van Langdonc (onleesbaar) ende verlide dat hi genommen hadde teghens den proeste van + den nonnen der ordenen van Premonstreyt , wonende bi Breda , ende van sinen momboere die hem metten vonnesse ende rechte dairt toe wairt ghegheven , tot enen rechten erfpachte alsulc goet alse dese voirs_ proest ende convent ligghende hebben tot cleen Oekel , eest in husinghe oft in erve oft in wat manieren dat dair gheleghen is , over zeven zester rogcs ende drie zester gersten ende een halster gersten goede ende custbare tsjaers te gheldene altoes ende alle jare den voirnoemden godshuyse binnen hoeren convente , metter maten van Breda op onser vrouwen dach lichtmisse , als + men kerssen draghet , ende omme die meere zekerheyt , so heeft Heinric voirs_ gheseet tot eenen onderpande den proeste ende convente voirs_ een zester rogcs tsjaers op drie stucken lants , daer + men vyf lopen rogcs op zayen mach , gheleghen voir Wouters van Cartscoet in Margrieten heyninghen van Haseldonc . Ende desen voirs_ onderpant heeft Heinric voirs_ ghelovet vry te waeren van allen commere uutghenomen den heren chyns . Voirt es vorwairde soe wanneer Heinric voers_ bewyst den proeste ende convente voirs_ een zester rogcs tsjaers op goeden onderpant dairs tgodhuys voirs_ wael aen ghehouden is , dat dan dese voirs_ vyf lopen saeyt~lants quyte , vry ende onghebonden sullen wesen van den voirscr_ erfpachte . Voirt sal Heinric voerscr_ ghelden alle jare den heren chyns van desen voirs_ goede , ende dat alsoe bewaeren datter dit voirs_ godshuus gheen scade af en hebben ; voirt sal Heinric voirs_ die woenstede die op desen voirs_ goede staet , dat huys ende scure altoes dair op houden tot eenre vierstat ende woenstede also dat die voirs_ husinghe altoes drie pont grote payments weerdich sullen wesen , munten dair deen coman ? anderen mede betalen mach . Voirt es voirwaerde , wairt dat dit voirs_ goet vertiert woirde in cope , dat + ment altoes verzoeken soude aen dit voers_ godshuys metten heelen pachte ; ende hoe dicke dat vertiert woirt in sterften dat + ment alsoe meenichwerf verzoeken sal metten vierendeel van + den voirs_ pachte . In orconden desen brieve bezeghelt met onsen zeghellen int jair ons Heeren M . + CCC . + tsestich ende drie , acht daghe in hoymaent .