Corpus Van Reenen-Mulder (CRM14): Oorkonde K660r36401

Wy Jacop die Smit ende Willem Jans + zone , scepene in Oesterhout , orconden ende kennen met desen brieve dat voir ons quam Jan Lisebet Hermans + zone van Oirscot ende lyde dat hi ghenomen heeft tote enen rechten erfpacht jeghens heren Nyclaeuse proest ende ghemeen convent vanden nonnen wonende bi Breda , van + der oirden van Premonstreyt ende van Jannes den costere van Oesterhout hoeren mombair , die hem metten recht tote desen zaken ghegheven was , alsulc goet alse si ligghende hebben in + den gherecht van Oesterhout ende wileneer Aernts Haghens te wesen plach , om drie zester ende acht loepen erfpachts rogs goet ende custbair metter maten van Breda ghemeten ende ghelevert jairlicx in hoeren convente , altoes op onser vrouwen dach ter lichtmisse alse + men kersen draecht , ende dair toe , om vier cappoen ter zelver tyt te betalen , in alsulker vorwairden dat Jan voirs_ den heeren cyns van desen voirghenoemden goede alle jair betalen sel ende verwaren op sinen cost sonder den godshuse voirscreven eniche scade dair af te hebben . Ende wair dat zake dat dit voirghenoemde godshuys hier af commer ofde scade quame , dien heeft Jan voirs_ gheloeft oppe te rechten ende te beteren . Voirt zoe mach Jan voirs_ delven op dit voirghenoemde goet enen last torven tote zynre behoeften te bernen elx jaers ende niet meer . In kennessen der wairheyt hebben wy scepen voirscr_ desen brief bezeghelt met onsen zeghelen , int jair ons Heren M . + CCC . + vier en tsestich , xv daghe in Junio .